एआइको सहयोगबाट तयार पारिएको सांकेतिक तस्बिर ।
वीरगञ्ज । वीरगञ्ज महानगरपालिका–१ मा वडा बजेटबाट निर्माण गरिएको सडक निर्माण सम्पन्न भएको २४ घण्टा नबित्दै क्षतिग्रस्त भएपछि स्थानीयवासीले निर्माण कार्यको गुणस्तरमाथि गम्भीर प्रश्न उठाएका छन्। सडक एक दिनमै भत्किएपछि निर्माण कार्यमा लापरबाही भएको हो कि भन्ने आशंका व्यक्त गरिएको छ।
स्थानीयका अनुसार जनताको करबाट निर्माण गरिएको सडक यति छोटो समयमै क्षतिग्रस्त हुनु निर्माणको गुणस्तर, प्राविधिक अनुगमन तथा कार्यान्वयन प्रक्रियामाथि गम्भीर प्रश्न उठाउने विषय हो। उनीहरूले विकास निर्माणका काममा गुणस्तरभन्दा देखावटी कामलाई प्राथमिकता दिइएको आरोपसमेत लगाएका छन्।
हाल उक्त वडाका वडाध्यक्ष मनोज कुर्मी रहेका छन्। स्थानीयवासीले वडा बजेटबाट निर्माण गरिएको सडक एक दिनमै भत्किनु सामान्य विषय नभएको भन्दै सम्बन्धित निकायले तत्काल निर्माणको गुणस्तर परीक्षण गरी सत्यतथ्य सार्वजनिक गर्नुपर्ने माग गरेका छन्।
उनीहरूले निर्माण कार्यमा संलग्न निर्माण व्यवसायी, प्राविधिक तथा अनुगमन गर्ने निकायको भूमिकाबारे निष्पक्ष छानबिन गरी कमजोरी वा लापरबाही पुष्टि भए कानुनबमोजिम कारबाही गर्नुपर्ने माग गरेका छन्। साथै, क्षतिग्रस्त सडकको गुणस्तरीय पुनर्निर्माण गर्नसमेत आग्रह गरेका छन्।
स्थानीयवासीका अनुसार विकास निर्माणमा विनियोजित सार्वजनिक बजेटको प्रभावकारी उपयोग सुनिश्चित गर्न गुणस्तरीय निर्माण, नियमित प्राविधिक अनुगमन तथा जवाफदेहितामा विशेष ध्यान दिन आवश्यक रहेको छ।
यस विषयमा वडा कार्यालय वा निर्माण पक्षको आधिकारिक प्रतिक्रिया भने समाचार तयार पार्दासम्म प्राप्त हुन सकेको छैन। प्रतिक्रिया प्राप्त भएपछि समाचार अद्यावधिक गरिनेछ।
यात्रा डेली
