वीरगञ्ज ।  विश्वकप फुटबल २०२६ अन्तर्गत समूह ‘एफ’ मा जापान र नेदरल्याण्ड्सबीचको खेल २–२ गोलको बराबरीमा सकिएको छ । अमेरिकाको डलासस्थित एटी एन्ड टी स्टेडियममा सोमबार बिहान भएको प्रतिस्पर्धामा जापानले दुई पटक पछाडि परेको अवस्था उल्टाउँदै महत्त्वपूर्ण एक अङ्क बटुलेको हो ।

पहिलो हाफ गोलरहित बराबरीमा टुङ्गिएको खेलमा दुवै टोलीले सावधानीपूर्वक प्रदर्शन गरेका थिए । खेलको सुरुमै नेदरल्याण्ड्सका डोनेएल मालेनको प्रहार जापानी गोलरक्षक जिओन सुजुकीले बचाएका थिए ।

दोस्रो हाफ सुरु भए लगत्तै खेलले गति लियो। ५१औँ मिनेटमा कप्तान भर्जिल भान डिज्कले रायन ग्रेभेनबर्चको क्रसलाई हेडरमार्फत गोलमा परिणत गर्दै डच टोलीलाई १–० को अग्रता दिलाए । तर ५७औँ मिनेटमा केइतो नाकामुराले ताकेफुसा कुबोको पासमा गोल गर्दै जापानलाई १–१ को बराबरीमा ल्याए ।

६४औँ मिनेटमा क्राइसेन्सियो समरभिलले पुनः ग्रेभेनबर्चकै पासमा आकर्षक गोल गर्दै नेदरल्याण्ड्सलाई २–१ को अग्रता दिलाए । त्यसपछि खेलमा जापानले आक्रामक दबाब बढायो। अन्ततः ८८औँ मिनेटमा कोकी ओगावाको कर्नरमा डाइची कामदाले प्रहार गरेको बल डिफ्लेक्ट हुँदै गोलमा परिणत भएपछि खेल २–२ को बराबरीमा पुग्यो।  बाँकी समयमा दुवै टोलीले गोल थप्न नसक्दा अङ्क बाँड्न बाध्य भए ।

बराबरीसँगै नेदरल्याण्ड्सको समूह चरणमा अपराजित यात्रा १७ खेलसम्म पुगेको छ । तर दुई पटक अग्रता लिएर पनि जित सुरक्षित गर्न नसक्दा डच टोली निराश देखिएको छ ।

खेलपछि जापानका प्रशिक्षक हाजिमे मोरियासुले खेलाडीहरूको दृढता र धैर्यको प्रशंसा गरे । “हाम्रा खेलाडीहरू अन्तिमसम्म लडे । अवसरको सदुपयोग गर्न सकेकाले हामीले महत्त्वपूर्ण अङ्क पायौँ,” उनले भने ।

यता डच कप्तान भान डिज्कले अग्रता जोगाउन नसक्दा निराशा व्यक्त गरे । प्रशिक्षक रोनाल्ड कोम्यानले भने जापानलाई कम आङ्कलन नगर्न चेतावनी दिए ।

बराबरीपछि समूह ‘एफ’ को प्रतिस्पर्धा थप रोचक बनेको छ । अब नेदरल्याण्ड्सले आगामी शनिवार स्विडेनसँग खेल्नेछ भने जापानले ट्युनिसियाको सामना गर्नेछ ।