वीरगञ्ज । विश्वकै सबैभन्दा चर्चित खेल महाकुम्भ फिफा विश्वकप फुटबल–२०२६ आजदेखि सुरु हुँदै छ । उद्घाटन खेलमा मेक्सिको र दक्षिण अफ्रिकाबिच प्रतिस्पर्धा हुनेछ । नेपाली समयअनुसार मध्यरात १२:४५ बजे मेक्सिको सिटीस्थित ऐतिहासिक एस्टाडियो अज्टेका रङ्गशालामा रेफ्रीको ह्विस्सलसँगै विश्वकपको औपचारिक सुरुआत हुनेछ ।
सन् २०१० को विश्वकपको उद्घाटन खेलमा आमनेसामने भएका दुई टोली १६ वर्षपछि पुनः उद्घाटनमै भिड्न लागेका हुन् । करिब ८० हजार दर्शक क्षमताको रङ्गशालामा भव्य उद्घाटन समारोहसहित प्रतियोगिता सुरु हुने अपेक्षा गरिएको छ ।
४८ टोली, १०४ खेल, ३९ दिन
इतिहासकै सबैभन्दा ठुलो विश्वकपका रूपमा यस संस्करणमा पहिलो पटक ४८ राष्ट्र सहभागी हुँदै छन् । यसअघि ३२ टोली सहभागी हुने प्रतियोगितामा यस पटक १६ टोली थपिएका छन् । कुल १०४ खेल ३९ दिनसम्म सञ्चालन हुनेछन्, जुन कतार २०२२ भन्दा ४० खेल बढी हो ।
प्रतियोगिता अमेरिका, मेक्सिको र क्यानडाका १६ सहरमा आयोजना हुँदै छ । तीमध्ये ११ सहर अमेरिका, ३ मेक्सिको र २ क्यानडामा रहेका छन् । फाइनल खेल जुलाई १९ मा न्युयोर्क–न्यु जर्सीस्थित मेटलाइफ रङ्गशालामा हुनेछ । च्याम्पियन टोलीले उपाधिसम्म पुग्न ८ खेल खेल्नुपर्नेछ ।
तीन सहरमा उद्घाटन समारोह
यस पटक उद्घाटन समारोह विशेष रहनेछ । मेक्सिको सिटी, टोरन्टो र लस एन्जलसमा छुट्टाछुट्टै कार्यक्रम आयोजना गरिनेछ । मुख्य समारोह मेक्सिको सिटीमा हुनेछ, जहाँ शाकिरा, बर्ना ब्वाय, जे बाल्भिन र टाइला लगायतका अन्तर्राष्ट्रिय कलाकारहरूको प्रस्तुति रहनेछ ।
आयोजक राष्ट्रको अपेक्षा
घरेलु समर्थकको दबाब र उत्साहबिच तीनै आयोजक राष्ट्र राम्रो प्रदर्शन गर्ने लक्ष्यमा छन् ।
क्यानडा प्रशिक्षक जेसी मार्सको नेतृत्वमा जोनाथन डेभिड, साइल लारिन र टाजोन बुकाननजस्ता खेलाडीका साथ मैदान उत्रँदै छ । अल्फोन्सो डेभिजको फिटनेस केही चिन्ताको विषय भए पनि क्यानडालाई समूह चरण पार गर्ने दाबेदार मानिएको छ ।
मेक्सिको प्रशिक्षक हाभियर अगुइरेको नेतृत्वमा आत्मविश्वासका साथ प्रतिस्पर्धा गर्दै छ । विश्वकपअघि सर्बियामाथि ५–१ को जितले टोलीको मनोबल उच्च बनाएको छ ।
अमेरिकाले माउरिसियो पोचेटिनोको प्रशिक्षणमा नयाँ ऊर्जा पाएको छ । सेनेगलविरुद्धको जित र जर्मनीसँगको प्रतिस्पर्धात्मक खेलपछि अमेरिकी समर्थकहरू आशावादी बनेका छन् ।
मेसी र रोनाल्डोको सम्भावित अन्तिम विश्वकप
अर्जेन्टिनाका कप्तान लियोनल मेसीका लागि यो सम्भवतः अन्तिम विश्वकप हुनेछ । ३९ वर्ष पुग्ने मेसी अर्जेन्टिनालाई लगातार दोस्रो उपाधि दिलाउने लक्ष्यमा छन् । सन् १९६२ यता कुनै पनि राष्ट्रले लगातार दुई विश्वकप जित्न सकेको छैन ।
४१ वर्षीय क्रिस्टियानो रोनाल्डो पनि पोर्चुगलबाट सहभागी छन् । विश्वकप उपाधि अझै उनको करिअरको ‘अपूर्ण सपना’ हो । बलियो टोलीका कारण पोर्चुगल उपाधिको प्रमुख दाबेदारमध्ये एक मानिएको छ ।
फ्रान्सका किलियन एमबाप्पे, इङ्ल्यान्डका ह्यारी केन, स्पेनका युवा स्टार लामिन यामाल, ब्राजिलका राफिन्हा र नेयमार लगायतका खेलाडीहरू प्रतियोगिताका अन्य आकर्षण रहनेछन् ।
गर्मी र रणनीति
उत्तर अमेरिकाको गर्मी यस पटकको चर्चाको विषय बनेको छ । उच्च तापक्रमका कारण प्रत्येक हाफमा ‘कुलिङ ब्रेक’को व्यवस्था गरिएको छ । लामो क्लब सिजनपछि आएका खेलाडीहरूलाई मौसमसँग अभ्यस्त हुन समय लाग्न सक्ने अनुमान गरिएको छ, जसका कारण सुरुआती चरणमा अप्रत्याशित नतिजा आउन सक्ने सम्भावना छ ।
डार्क हर्सको सम्भावना
विश्वकपमा सधैँझैँ यस पटक पनि केही टोली ‘डार्क हर्स’का रूपमा उदाउन सक्छन् । स्कटल्यान्ड, नर्वे, मोरक्को, आइभोरी कोस्ट, इक्वेडर र सेनेगललाई सम्भावित चुनौतीकर्ता मानिएको छ । एर्लिङ हालान्ड र मार्टिन ओडेगार्डको नर्वे तथा मोरक्कोले ठूला टोलीलाई चुनौती दिन सक्ने विश्लेषण गरिएको छ ।
त्यस्तै उज्वेकिस्तान, हाइटी, कुरासाओ र केप भर्डेजस्ता टोलीहरू नयाँ इतिहास रच्ने लक्ष्यसहित मैदान उत्रनेछन् ।
विश्व फुटबलको नयाँ युगको सुरुआतसँगै ४८ टोली, १०४ खेल र ३९ दिनको रोमाञ्चक यात्रापछि विश्वले नयाँ च्याम्पियन पाउनेछ । अहिले विश्वभरका फुटबल प्रेमीको नजर मेक्सिको सिटीमा केन्द्रित भएको छ ।
यात्रा डेली
