फाइल तस्बिर ।
वीरगञ्ज । नेपाल विद्यार्थी संघ (नेविसंघ) पर्साका अध्यक्ष रमेश यादवले ठाकुरराम बहुमुखी क्याम्पस र वीरगञ्ज नर्सिङ क्याम्पसमा हालै सम्पन्न स्वतन्त्र विद्यार्थी युनियन (स्ववियु) निर्वाचनमा सङ्गठनको पराजयको सम्पूर्ण जिम्मेवारी आफूमाथि लिएका छन् ।
शुक्रवार यात्रा डेलीसँगको कुराकानीमा उनले पर्सा जिल्लाका दुवै शैक्षिक संस्थाहरूमा भएको स्ववियु निर्वाचनमा नेविसंघको हारको कारण सङ्गठनभित्रको आन्तरिक द्वन्द्व, बागी उम्मेदवारी र फर्जी मतको प्रयोग भएको गम्भीर आरोप लगाएका छन् ।
अध्यक्ष यादवले ठाकुरराम बहुमुखी क्याम्पसको स्ववियु निर्वाचनमा नेविसंघका सभापति उम्मेदवार विकास मण्डल धानुकको नेतृत्वमा आफूले एकल रूपमा काम गरेको बताए । उनले भने, “विकास मण्डलले सङ्गठनको मर्यादा र अनुशासनमा रहेर स्वच्छ रूपमा निर्वाचन लडेका थिए । तर, पार्टीभित्रबाट बागी उम्मेदवारी दिनेहरूले छ महिनादेखि तयारी गरेर सङ्गठनलाई कमजोर बनाउने काम गरे ।” यादवले निर्वाचनको २-३ दिनअघि मात्रै जिल्लाका नेताहरूलाई विकास मण्डलको पक्षमा सहयोग गर्न आग्रह गरेको बताउँदै पार्टीभित्रको असहयोगले हार निम्तिएको सङ्केत गरे ।
उनले हार र जितको श्रेय आफ्नै नाममा लिएको उल्लेख गर्दै मण्डलको नेतृत्वलाई सङ्गठनको उचाइमा पुर्याउनु आफ्नो प्रयास रहेको दाबी गरे । तर, नेपाली काँग्रेस पर्सा र नेविसंघभित्रको आन्तरिक भाँडभैलो र राजनीतिक खेलले निर्वाचनमा गहिरो असर परेको उनको ठहर छ । “पार्टीका वरिष्ठ नेताहरू, पूर्व मन्त्रीहरू र प्रदेशसभा सदस्यहरूको नाम जोडेर मिडियामार्फत आफ्नो उचाइ बढाउन खोज्नेहरूले सङ्गठनको अनुशासन विपरीत काम गरे,” उनले भने । “बागी उम्मेदवारी दिनेहरूले सङ्गठनको नीति र सिद्धान्तलाई कमजोर बनाए । भोलि उनीहरूले नेतृत्व गर्दा पनि यस्तै नाटक मञ्चन गरे भने सङ्गठनको भविष्य के हुन्छ?” उनले प्रश्न गरे ।
यादवले निर्वाचनमा फर्जी मतको प्रयोग भएको भन्दै ठाकुरराम बहुमुखी क्याम्पसमा पाँच सयदेखि दुई हजारसम्म फर्जी सर्टिफिकेट र मतदाताहरूको दुरुपयोग भएको दाबी गरे । उनले अनियमितताको प्रमाणसहित जिल्ला प्रशासन कार्यालय पर्सामा उजुरी दर्ता गरिएको जानकारी दिए । “प्रमाणहरूको आधारमा छानबिन भयो भने धेरै कुरा बाहिर आउँछ । फर्जी मतको प्रयोगले धेरै विद्यार्थीहरूको अधिकार हनन भएको छ,” उनले भने । यादवले यस्तो प्रवृत्तिले आम काँग्रेसी कार्यकर्ताहरूमा निराशा पैदा गरेको बताए ।
नेविसंघसँग विद्रोह गरेर बागी उम्मेदवारी दिने समूहलाई यादवले प्रतिपक्षको रूपमा चित्रण गरेका छन् । “मैले सङ्गठनको इमानदारीका साथ नेतृत्व गरिरहेको छु । बागी समूह र तिनलाई समर्थन गर्नेहरूसँग मेरो प्रतिस्पर्धा हो,” उनले भने । उनले स्ववियु निर्वाचनलाई लिएर मिडियामा आएका समाचारहरूलाई “राजनीतिक प्रपञ्च” को संज्ञा दिँदै यस्ता कार्यले सङ्गठनलाई फाइदा नभई घाटा पुग्ने बताए । “पार्टीका वरिष्ठ नेताहरूको नाम जोडेर बागी समूहले आफ्नो अभीष्ट पूरा गर्न खोजे पनि यो सङ्गठनको हितमा छैन,” उनले थपे ।
स्ववियु निर्वाचनमा बागी उम्मेदवारी दिएर जित हासिल गर्नेहरूको राजनीतिक भविष्य सुनिश्चित नहुने यादवको तर्क छ । उनले विगतका उदाहरण दिँदै भने, “ठाकुरराम बहुमुखी क्याम्पसमा स्ववियु सभापतिमा दुई पटक निर्वाचित विजय सर्राफ, मनोज यादव, वैकुण्ठ श्रीवास्तव, मुकेश द्विवेदी जस्ता व्यक्तित्वहरूले जित हासिल गरेका थिए । तर, आज उनीहरू राजनीतिक यात्रामा कतै देखिँदैनन् ।” उनले नेतृत्व क्षमता, कुशल योजना र मातृ पार्टीसँगको सम्बन्ध बलियो नभए स्ववियुको जितले मात्र भविष्यमा प्रभाव नपार्ने बताए ।
यादवले हार स्वीकार गर्नु नै राजनीतिक यात्राको अन्त्य नभएको उदाहरण पनि प्रस्तुत गरे । “वैकुण्ठ श्रीवास्तवबाट हार स्वीकार गरेका इम्तियाज आलम आज नेपाली काँग्रेसको कोषाध्यक्ष, सचिव हुँदै वीरगञ्ज महानगरपालिकाको उपप्रमुख पदमा कायम छन् । हार र जित प्रक्रियाको हिस्सा हो,” उनले भने ।
यादवले स्ववियु निर्वाचनमा अन्य राजनीतिक दलको संलग्नतामाथि पनि प्रश्न उठाए । उनले भने, “नेविसंघको उम्मेदवारी भनिरहँदा कसको नेतृत्वमा निर्वाचन लडियो? दल दर्तादेखि विजय जुलुससम्म अन्य पार्टीका कार्यकर्ताको सहभागिता देखियो ।” उनले यो प्रश्नले निर्वाचन प्रक्रियाको पारदर्शितामाथि समेत शङ्का उत्पन्न गरेको बताए ।
रमेश यादवले स्ववियु निर्वाचनको परिणामलाई प्रक्रियाको हिस्सा मान्दै जित र हार स्वाभाविक भएको बताए । तर, सङ्गठनभित्रको अनुशासनहीनता, फर्जी मतको प्रयोग र बागी उम्मेदवारीले नेविसंघको साखमाथि प्रश्न उठेको उनको ठहर छ । “हामी प्रमाणसहित अगाडि बढ्छौँ र सङ्गठनको मर्यादालाई कायम राख्छौँ,” उनले यात्रा डेलीलाई भने ।
यादवले निर्वाचन प्रक्रियालाई बुझ्ने र सिक्ने क्रममा आफूहरू रहेको उल्लेख गर्दै आगामी दिनमा यस्ता समस्याहरूको समाधान खोजिने सङ्केत गरे ।
वीरगञ्जको स्ववियु निर्वाचनमा नेविसंघको पराजयले सङ्गठनभित्रको आन्तरिक सङ्कट र राजनीतिक खेललाई उजागर गरेको छ । रमेश यादवले हारको जिम्मेवारी लिँदै सङ्गठनको मर्यादा र अनुशासन कायम राख्न प्रमाणसहित अगाडि बढ्ने प्रतिबद्धता जनाएका छन् । तर, बागी उम्मेदवारी, फर्जी मतको प्रयोग र अन्य दलको संलग्नताको आरोपले नेविसंघको आगामी रणनीति र नेतृत्वमाथि थप चुनौती खडा गरेको छ । स्ववियुको जित वा हारले मात्र राजनीतिक भविष्य निर्धारण नगर्ने भए पनि सङ्गठनको एकता र नेतृत्व क्षमताले नै यसको दिशा तय गर्ने देखिन्छ ।
आशुकुमार सर्राफ
