वीरगञ्ज । पर्साको वीरगञ्जस्थित गौतम माध्यमिक विद्यालयले शैक्षिक सत्र २०८३ का लागि गठन गरिएको विद्यार्थी परिषद् (स्टुडेन्ट काउन्सिल) लाई औपचारिक रूपमा पद तथा जिम्मेवारी हस्तान्तरण गर्दै इन्भेस्टिचर समारोह–२०८३ भव्य रूपमा सम्पन्न गरेको छ।

विद्यालयका प्रधानाध्यापक गणेश क्षेत्रीको अध्यक्षतामा आयोजित कार्यक्रममा नेपाली सेनाको वीरगञ्जस्थित श्री जंग गणका गणपति (कर्णेल) लोकेन्द्र कार्की प्रमुख अतिथिका रूपमा सहभागी भएका थिए। कार्यक्रममा विद्यालयका प्रशासन प्रमुख रमेश शर्मा, सहायक प्रधानाध्यापक ललित कर्ण, सौराज प्रधान, एल्भिन सर, जुनियर को–अर्डिनेटर सिपेन्द्र गुप्ता, शिक्षक–शिक्षिका, अभिभावक तथा विद्यार्थीहरूको उल्लेखनीय उपस्थिति रहेको थियो।

समारोहमा कक्षा १० मा अध्ययनरत विद्यार्थीहरूलाई विद्यालयको नेतृत्वदायी जिम्मेवारी प्रदान गर्दै सम्बन्धित पदअनुसार ब्याज (Badge) लगाएर सम्मान गरिएको थियो।

विद्यालयका अनुसार यस वर्ष स्वरा झा हेड गर्ल, अभिनव ठाकुर हेड ब्वाय, प्रियम कुमारी सिन्हा र सिद्धार्थ कुमार मिश्रा हेड प्रिफेक्ट, अदिति पिठाकोटे मगर र बासु चौरसिया अतिरिक्त क्रियाकलाप (ECA) प्रमुख, आर्या चौरसिया र अंकित कुमार अनुशासन प्रमुख, रिजन चापागाईं र स्वस्तिका रौनियार सामाजिक पहुँच प्रमुख, दिप्शिखा गुप्ता र अनिश चौधरी खेलकुद प्रमुख, जबेरिया खातुन र आलोक शाह भाषा प्रमुख, रुशाली माली श्रेष्ठ र अर्नव केजरीवाल डिजिटल वेलनेस प्रमुख तथा मेहविश प्रवीन र ऋषभ गुप्ता सह–पाठ्यक्रम (CCA) प्रमुखको जिम्मेवारी प्रदान गरिएको छ।

यस अवसरमा अन्य विभिन्न विद्यार्थीहरूलाई पनि उनीहरूको जिम्मेवारीअनुसार विभिन्न ब्याज वितरण गरिएको विद्यालयले जनाएको छ।

कार्यक्रमलाई सम्बोधन गर्दै प्रमुख अतिथि कर्णेल लोकेन्द्र कार्कीले विद्यालय जीवनमै नेतृत्व, अनुशासन, जिम्मेवारी र सेवाभावको विकास गर्न सके भविष्यमा सक्षम र जिम्मेवार नागरिक बन्न सहज हुने बताए। उनले विद्यार्थी परिषद्मा चयन भएका सबै विद्यार्थीलाई इमानदारी, समर्पण र उत्तरदायित्वका साथ आफ्नो जिम्मेवारी निर्वाह गर्न आग्रह गरे।

विद्यालयका प्रधानाध्यापक गणेश क्षेत्रीले विद्यार्थी परिषद् विद्यालयमा नेतृत्व विकास गर्ने प्रभावकारी अभ्यास भएको उल्लेख गर्दै नवनिर्वाचित पदाधिकारीहरूले विद्यालयको अनुशासन, शैक्षिक वातावरण तथा अतिरिक्त क्रियाकलापलाई अझ सुदृढ बनाउन महत्वपूर्ण भूमिका खेल्ने विश्वास व्यक्त गरे।

उत्साहपूर्ण वातावरणमा सम्पन्न इन्भेस्टिचर समारोहले विद्यार्थीहरूमा नेतृत्व क्षमता, उत्तरदायित्व, अनुशासन तथा सहकार्यको भावना अभिवृद्धि गर्ने विश्वास विद्यालय परिवारले व्यक्त गरेको छ।