वीरगञ्ज । भारतको बिहार राज्यस्थित मधुबनी जिल्लाको भौआडा क्षेत्रबाट मौलाना इजहारुल हकलाई विशेष सुरक्षा टोलीले पक्राउ गरेपछि उक्त घटना चर्चाको विषय बनेको छ।

भारतीय सञ्चारमाध्यमहरूका अनुसार मंगलबार बिहान मध्य प्रदेश प्रहरीको विशेष टोली (एसटीएफ/एसटीएस) ले मधुबनी प्रहरीको सहयोगमा मौलाना इजहारुल हकलाई नियन्त्रणमा लिएको हो। पक्राउपछि उनलाई थप अनुसन्धानका लागि मध्य प्रदेश लगिएको बताइएको छ।

प्रारम्भिक अनुसन्धानका क्रममा मौलाना इजहारुल हकमाथि पाकिस्तानको गुप्तचर संस्था आईएसआईसँग सम्बन्ध रहेको तथा सामाजिक सञ्जालमार्फत गतिविधि सञ्चालन गरेको आरोप लगाइएको भारतीय सुरक्षा स्रोतहरूले दाबी गरेका छन्। साथै नेपाल र भारतका केही क्षेत्रमा बैठक आयोजना गरी गतिविधि विस्तार गर्ने प्रयास गरेको आरोपसमेत लगाइएको छ।

यद्यपि, उनीमाथि लगाइएका आरोपहरू अदालतबाट प्रमाणित भइसकेका छैनन्। सम्बन्धित सुरक्षा निकायहरूले घटनाबारे थप अनुसन्धान भइरहेको जनाएको छ।

स्थानीय रूपमा मौलाना इजहारुल हक धार्मिक विद्वान तथा वक्ताका रूपमा परिचित रहेको बताइएको छ। विभिन्न धार्मिक कार्यक्रमहरूमा सहभागी हुँदै आएका उनीमाथि लगाइएका आरोप र पक्राउको घटनापछि मधुबनी क्षेत्रमा व्यापक चासो देखिएको छ।

भारतीय सुरक्षा निकायहरूले घटनासम्बन्धी थप विवरण सार्वजनिक गरिनसकेको र अनुसन्धानको निष्कर्ष आएपछि मात्र विस्तृत जानकारी उपलब्ध हुने बताएका छन्।