वीरगञ्ज । वीरगञ्ज महानगरपालिकामा आतिशबाजी, पटका र राति १० बजेपछि डिजे प्रयोगमा लगाइएको प्रतिबन्धको निर्णयले स्थानीय स्तरमा तीव्र विरोध उत्पन्न भएको छ ।

जिल्ला प्रशासन कार्यालय पर्साले बुधवार प्रमुख जिल्ला अधिकारी गणेश अर्यालको अध्यक्षतामा बसेको सरोकारवालाहरूको बैठकमार्फत आतिशबाजी, पटका र राति १० बजेपछि डिजे प्रयोगमा प्रतिबन्ध लगाउने निर्णय गरेपछि स्थानीय जनप्रतिनिधि, राजनीतिक व्यक्ति र सामाजिक अगुवाहरूले निर्णय मधेसी र हिन्दु संस्कृति विरोधी भएको भन्दै कार्यान्वयन गर्न नसकिने अडान लिएका छन् ।

पर्साको सखुवा प्रसौनी गाउँपालिकाका अध्यक्ष यसवन्त यादवले निर्णयलाई हचुवाको भरमा लिइएको र सामाजिक–सांस्कृतिक दृष्टिकोणले असान्दर्भिक भएको टिप्पणी गरे । उनले भने, “मधेसी समुदायको विवाह प्रायः ढिलो हुन्छ, राति १० बजेपछि बारात निस्कने परम्परा छ । यस्तोमा डिजेमा प्रतिबन्ध लगाउनु सान्दर्भिक छैन ।” उनले स्थानीय तहका सबै जनप्रतिनिधिहरूसँग छलफल नगरी केही सरोकारवालासँग मात्र बसेर गरिएको निर्णयलाई अस्वीकार गर्ने बताए । यादवले निर्णयलाई मधेसी र हिन्दु संस्कृतिमाथिको आक्रमणको रूपमा चित्रण गरे ।

यस्तै, हिन्दुवादी नेता कृष्णा कुमार साहले नियमको कार्यान्वयनमा पक्षपात हुने आशङ्का व्यक्त गरे । उनले भने, “गरिब र पहुँचविहीन व्यक्तिहरूमाथि मात्र नियम लागु हुन्छ, तर पैसावाला र पहुँचवालाहरूले नियमको धज्जी उडाउँदै डिजे बजाउँछन् ।” उनले यस्ता गतिविधि भेटिएमा आफूले सशक्त विरोध गर्ने चेतावनी दिए । साहले निर्णयलाई हिन्दु संस्कृति विरोधी भएको आरोप लगाउँदै कार्यान्वयनमा चुनौती हुने दाबी गरे ।

विरोधकर्ताहरूले निर्णयले मधेसी समुदायको सांस्कृतिक परम्परालाई उपेक्षा गरेको आरोप लगाएका छन् । विशेष गरी विवाह र उत्सवमा रातको समयमा डिजे र आतिशबाजीको प्रयोग मधेसी समुदायको संस्कृतिको अभिन्न अङ्ग रहेको उनीहरूको तर्क छ । अध्यक्ष यादवले भने, “निर्णयले हाम्रो संस्कृति र परम्परालाई बुझ्न नसकेको देखिन्छ ।” यस्तै, साहले नियमको दुरुपयोग गरी पहुँचवालाहरूलाई छुट दिने सम्भावना रहेको भन्दै सामाजिक असमानताको मुद्दा उठाए ।

जिल्ला प्रशासन कार्यालयको बैठकमा आतिशबाजी र पटकाको प्रयोगमा पूर्ण प्रतिबन्ध लगाउने र ध्वनि प्रदूषण नियन्त्रणका लागि राति १० बजेपछि डिजे बन्द गर्ने सहमति भएको थियो । प्रशासनले निर्णयमार्फत ध्वनि र वायु प्रदूषण नियन्त्रण गर्ने लक्ष्य राखेको छ । आतिशबाजी र पटकाले वातावरणमा नकारात्मक असर पार्ने र डिजेका कारण रातको समयमा स्थानीय बासिन्दालाई असुविधा भएको गुनासो बढ्दो थियो । प्रशासनले राति १० बजेपछि डिजे बन्द गरेर शान्त वातावरण कायम गर्ने अपेक्षा गरेको छ । यद्यपि, सांस्कृतिक संवेदनशीलतालाई बेवास्ता गरेको भन्दै विरोधले निर्णयको कार्यान्वयनमा जटिलता थपेको छ ।