वीरगञ्ज । वीरगञ्जमा हनुमान जयन्तीको शोभा यात्राका क्रममा भएको दुई पक्षबिचको झडप र त्यसबाट सिर्जित तनावलाई लिएर मुस्लिम सङ्घ पर्साका अध्यक्ष जफर अन्सारीले एभिन्यूज टेलिभिजनमा दिएको अभिव्यक्तिलाई लिएर वीरगञ्ज उद्योग वाणिज्य सङ्घले कडा आपत्ति जनाएको छ ।
सङ्घले अन्सारीको उक्त अभिव्यक्तिलाई गैरजिम्मेवारीपूर्ण, आधारहीन र सामाजिक सद्भाव बिथोल्ने खालको भन्दै तत्काल फिर्ता लिई सार्वजनिक माफी माग्न माग गरेको छ । साथै, यस्ता अभिव्यक्ति दिने व्यक्तिमाथि कडा कानुनी कारबाहीको माग गर्दै अन्यथा कानुनी उपचार खोज्ने चेतावनी दिएको छ ।
चैत ३० गते वीरगञ्जमा हनुमान जयन्तीको शोभा यात्राका क्रममा दुई समुदायबिच झडप भएको थियो । मस्जिदबाट ढुङ्गा प्रहार भएको आरोपपछि सुरु भएको उक्त झडपले तनावग्रस्त स्थिति सिर्जना गरेको थियो । घटनामा नेपाल प्रहरी, सशस्त्र प्रहरी र सर्वसाधारणसहित ४३ जना घाइते भएका थिए । स्थिति नियन्त्रणमा लिन जिल्ला प्रशासन कार्यालयले शनिवार साँझदेखि आइतबार मध्यरातसम्म कर्फ्यु आदेश जारी गरेको थियो । आइतबार जिल्ला प्रशासन कार्यालयमा सर्वपक्षीय बैठकले पाँच बुँदे सहमति गर्दै दोषीलाई २४ घण्टाभित्र कानुनी दायरामा ल्याउने र सामाजिक सद्भाव कायम राख्ने प्रतिबद्धता जनाएको थियो ।
हनुमान जयन्तीको घटनाक्रमलाई लिएर मुस्लिम सङ्घ पर्साका अध्यक्ष जफर अन्सारीले एभिन्यूज टेलिभिजनमा दिएको अन्तर्वार्तामा वीरगञ्ज उद्योग वाणिज्य सङ्घका पूर्व अध्यक्ष अशोककुमार वैध, वीरगञ्ज महानगरपालिकाका प्रमुख राजेशमान सिंह र मित्रराष्ट्र भारतको प्रतिष्ठित संस्था (राष्ट्रिय स्वयम् सेवक संघ) समेत हात रहेको भन्ने अभिव्यक्ति दिएका थिए ।
वीरगञ्ज उद्योग वाणिज्य सङ्घले अन्सारीको अभिव्यक्तिलाई तथ्यहीन, आधारहीन र सामाजिक सद्भाव बिथोल्ने खालको ठहर गरेको छ । सङ्घका अध्यक्ष हरि गौतमद्वारा जारी प्रेस विज्ञप्तिमा भनिएको छ, “जिम्मेवार पदमा बसेर सामाजिक सद्भाव कायम राख्ने दायित्व निर्वाह गर्नुको साटो ठिक विपरीत गैरजिम्मेवारीपूर्ण बयान दिनु अक्षम्य छ ।”
विज्ञप्तिमा अन्सारीले मित्रराष्ट्र भारतको आरएसएसको नाम जोडेर दिएको अभिव्यक्तिले नेपाल र भारतबिचको वर्षौँदेखिको मैत्रीपूर्ण सम्बन्धमा नकारात्मक असर पर्ने चिन्ता व्यक्त गरिएको छ । सङ्घले यस्ता अभिव्यक्तिहरूले दुई देशबिचको सम्बन्ध बिगार्ने र सामाजिक सद्भावमा खलल पुर्याउने भन्दै यस्ता गतिविधिमा संलग्न व्यक्तिमाथि कडा कानुनी कारबाहीको माग गरेको छ । “यस्ता आधारहीन र तथ्यहीन अभिव्यक्तिहरूले सामाजिक एकता र अन्तर्राष्ट्रिय सम्बन्धमा गम्भीर असर पार्छ । यस्ता व्यक्तिमाथि कडाभन्दा कडा कारबाही हुनुपर्छ,” विज्ञप्तिमा उल्लेख छ ।
वीरगञ्ज उद्योग वाणिज्य सङ्घ उद्योग, व्यापार र वीरगञ्जको समग्र विकासमा समर्पित संस्थाको रूपमा स्थापित छ । सङ्घले मुलुकमा शान्ति, सुव्यवस्था र सामाजिक सद्भाव कायम रहनुपर्ने तथा उद्योग–व्यापार निर्बाध रूपमा सञ्चालन हुनुपर्ने मान्यता राख्ने जनाएको छ । “हामी सधैँ सामाजिक सद्भाव र शान्तिको पक्षमा छौँ । यस्ता गैरजिम्मेवारीपूर्ण अभिव्यक्तिहरूले हाम्रो उद्देश्य र समाजको एकतामाथि आँच पुर्याउँछ,” सङ्घका अध्यक्ष गौतमले भने ।
सङ्घले जफर अन्सारीलाई आफ्नो अभिव्यक्ति तत्काल फिर्ता लिई सार्वजनिक रूपमा माफी माग्न माग गरेको छ । साथै, यस्ता अभिव्यक्तिहरूले सामाजिक सद्भाव र अन्तर्राष्ट्रिय सम्बन्धमा पार्ने असरलाई ध्यानमा राखी दोषीमाथि कडा कारबाही गर्न सम्बन्धित निकायसँग आग्रह गरेको छ । विज्ञप्तिमा भनिएको छ, “यस्ता गतिविधिमा कुनै सम्झौता नहुने र आवश्यक परे सङ्घ कानुनी उपचारको बाटो अवलम्बन गर्न बाध्य हुनेछ ।”
वीरगञ्जका स्थानीयवासी र सरोकारवालाहरूले सङ्घको कदमलाई सकारात्मक रूपमा लिएका छन् । उनीहरूले सामाजिक सद्भाव र शान्ति कायम गर्न सबै पक्षले जिम्मेवारीपूर्वक भूमिका निर्वाह गर्नुपर्नेमा जोड दिएका छन् । जिल्ला प्रशासन कार्यालय पर्साले पनि घटनाको निष्पक्ष छानबिन गरी दोषीलाई कारबाही गर्ने प्रतिबद्धता जनाएको छ ।
हनुमान जयन्तीको शोभा यात्रामा भएको झडप र त्यसपछिको तनावले वीरगञ्जमा सामाजिक सद्भावको महत्वलाई पुनः उजागर गरेको छ । यस्तो संवेदनशील समयमा जिम्मेवार व्यक्तिहरूबाट हुने गैरजिम्मेवारीपूर्ण अभिव्यक्तिले समाजमा थप तनाव सिर्जना गर्न सक्ने जोखिमप्रति सचेत रहनुपर्ने देखिन्छ । वीरगञ्ज उद्योग वाणिज्य सङ्घको कदमले सामाजिक एकता र शान्तिको पक्षमा बलियो सन्देश प्रवाह गरेको छ ।
आशुकुमार सर्राफ
