नयाँ दिल्ली । भारतीय किशोर प्रतिभा गुकेश डोम्माराजूले सिंगापुरमा आयोजित विश्व चेस च्याम्पियनशिपको अन्तिम खेलमा चीनका डिङ लिरेनलाई पराजित गर्दै विश्वको सबैभन्दा कम उमेरको निर्विवाद चेस च्याम्पियन बनेका छन् ।

गुकेशले १४औँ खेलमा डिङलाई हराएपछि ७.५ अङ्क हासिल गरे, जबकि डिङ ६.५ अङ्कमा सीमित रहे । यो उपलब्धिसँगै उनले रुसी चेस महानायक गेरी कास्परोभको २२ वर्षको उमेरमा विश्व च्याम्पियन बन्ने कीर्तिमानलाई तोड्दै नयाँ इतिहास रचे । गुकेश विश्व चेस च्याम्पियन बन्ने दोस्रो भारतीय खेलाडी पनि बनेका छन् । यसअघि पाँच पटकका विश्व च्याम्पियन विश्वनाथन आनन्दले यो उपलब्धि हासिल गरेका थिए ।

अन्तिम खेल निकै रोचक रह्यो । डिङले खेलमा गल्ती गरेपछि गुकेशलाई निर्णायक अवसर प्राप्त भयो । डिङको राजीनामासँगै गुकेशले विजय सुनिश्चित गरे । आफ्नो ऐतिहासिक जितपछि भावुक बनेका गुकेशले दुवै हातले अनुहार छोप्दै आँसु पुछेका थिए ।

उक्त रोमाञ्चक खेल हेर्न दर्जनौँ भारतीय र भारतीय मूलका स्थानीय सिंगापुरवासीसहित प्रशंसकहरूको उपस्थिति रहेको थियो । उनीहरूले गुकेशको विजयमा हर्षोल्लास व्यक्त गरे ।

विजयी भएको क्षणमा उदारता देखाउँदै गुकेशले आफ्नो प्रतिद्वन्द्वी डिङको प्रशंसा गरे । उनले डिङलाई “साँचो च्याम्पियन जस्तो लडेका एक उत्कृष्ट खेलाडी” भने ।

अन्तर्राष्ट्रिय चेस महासङ्घले सामाजिक सञ्जालमा “इतिहासमा सबैभन्दा कम उमेरको विश्व च्याम्पियन” बनेको भन्दै गुकेशलाई सम्मान व्यक्त गरेको छ ।