रक्सौल । रक्सौलस्थित आश्रम रोडमा रहेको सेवक संजय नाथ काली न्यास विद्यालय परिसरमा काली सेनाको नयाँ कार्यालय उद्घाटन गरिएको छ। मंगलबार साँझ आयोजित विशेष समारोहका बीच स्थानीय विधायक प्रमोद कुमार सिन्हाले रिबन काटेर कार्यालयको औपचारिक उद्घाटन गरेका हुन्।

उद्घाटन कार्यक्रममा काली मन्दिरका पीठाधीश्वर सेवक संजय नाथ, काली सेनाकी अध्यक्ष पार्वती तिवारी, विभिन्न सामाजिक अगुवा, महिला उद्यमी तथा स्थानीय सर्वसाधारणको उल्लेखनीय उपस्थिति रहेको थियो।

समारोहलाई सम्बोधन गर्दै विधायक प्रमोद कुमार सिन्हाले काली सेनाले महिलाहरूलाई स्वरोजगार, उद्यमशीलता र आत्मनिर्भरतासँग जोड्ने महत्वपूर्ण कार्य गरिरहेको भन्दै प्रशंसा गरे। उनले गृह उद्योगमार्फत महिलाहरूलाई आर्थिक रूपमा सक्षम बनाउने अभियान समाज रूपान्तरणको आधार भएको उल्लेख गरे।

“महिलाहरूलाई आत्मनिर्भर बनाउने कार्यले समाजमा सकारात्मक परिवर्तन ल्याउँछ,” उनले भने, “काली सेनाले आर्थिक रूपमा कमजोर तथा पिछडिएका महिलाहरूलाई रोजगारीसँग जोडेर उदाहरणीय काम गरिरहेको छ।”

उनले काली मन्दिरका पीठाधीश्वर सेवक संजय नाथले संस्थालाई निरन्तर प्रेरणा र सहयोग प्रदान गरिरहेको उल्लेख गर्दै काली सेनाको विस्तार र विकासका लागि आवश्यक सहयोग उपलब्ध गराउन आफू प्रतिबद्ध रहेको बताए।

विधायक सिन्हाले संस्थाकी अध्यक्ष पार्वती तिवारीको विशेष प्रशंसा गर्दै महिलाहरूलाई सीप, रोजगारी र आत्मविश्वाससँग जोड्न उनले खेलेको भूमिकालाई उदाहरणीय बताए।

कार्यक्रममा बोल्दै पीठाधीश्वर सेवक संजय नाथले महिलाहरूलाई सम्मानजनक जीवनयापनको अवसर सिर्जना गर्ने उद्देश्यले सुरु गरिएको अभियान काली सेनामार्फत विस्तार हुँदै गएको बताए। महिलाहरूले आफ्नै मेहनतबाट आम्दानी गर्न थालेको देख्दा आफूलाई गर्व लागेको उनले उल्लेख गरे।

काली सेनाकी अध्यक्ष पार्वती तिवारीका अनुसार हालसम्म संस्थामा करिब २ हजार ६ सय महिलाहरू आबद्ध भइसकेका छन्। उनीहरूले तिसौरी, अदौरी, अचारलगायत विभिन्न घरेलु उत्पादन तयार गरी आम्दानी गरिरहेका छन्। संस्थाका उत्पादनहरू स्थानीय बजारमा लोकप्रिय बन्दै गएको उनले जानकारी दिइन्।

उनले नयाँ कार्यालय सञ्चालनमा आएपछि संस्थाका गतिविधिहरू थप व्यवस्थित र प्रभावकारी हुने तथा अझ बढी महिलाहरूलाई स्वरोजगार र उद्यमशीलतासँग जोड्न सहज हुने विश्वास व्यक्त गरिन्।

समारोहमा भाजपा नेता अजय पटेल, मृत्युन्जय सिंह, समाजसेवी निरुल्लाह खान, कन्हैया सर्राफ, प्रेम गुप्ता, सैफुल आजम, अबरार खान, विमल सर्राफ, दीपू श्रीवास्तव, दीपक श्रीवास्तव, पप्पु साहलगायत विभिन्न क्षेत्रका व्यक्तित्वहरूको उपस्थिति रहेको थियो।

कार्यक्रममा सहभागीहरूले महिलाको आर्थिक सशक्तीकरण, घरेलु उद्योग प्रवर्द्धन तथा स्वरोजगार विस्तारमार्फत समाजमा सकारात्मक परिवर्तन ल्याउन काली सेनाले महत्वपूर्ण भूमिका खेलिरहेको धारणा व्यक्त गरेका थिए।