युक्रेनका राष्ट्रपति भोलोदिमर जेलेन्स्कीले सुरक्षा ग्यारेण्टीविनाको युद्धविरामले रुसको आक्रमणको दीर्घकालीन अन्त्य नल्याउने बताएका छन्।

बेलायतको लण्डनमा युरोपेली मित्रराष्ट्रहरूसँगको वार्तापछि आइतबार पत्रकार सम्मेलनमा जेलेन्स्कीले युद्धविरामले युद्ध अन्त्य गर्ने विचारलाई ‘पर्याप्त नभएको’ बताए।

आइतबारको सङ्कट शिखर सम्मेलनपछि फ्रान्सेली राष्ट्रपति इम्मानुएल म्याक्रोनले फ्रान्स र बेलायतले युक्रेनमा ‘हावामा, समुद्रमा र ऊर्जा पूर्वाधारमा’ एक महिनाको युद्धविरामको प्रस्ताव गरिरहेको बताए। यद्यपि यसले शुरुमा कम्तीमा जमीनी लडाइँलाई समेट्दैन।

‘यदि युक्रेनलाई गम्भीर सुरक्षा ग्यारेण्टीविना युद्धविरामका लागि बाध्य पारिएमा यो सबैका लागि एक असफलता हुनेछ’, जेलेन्स्कीले बेलायतबाट प्रस्थान गर्नुभन्दा केही समयअघि भने। उहाँले रुसले सम्झौता तोड्ने र युक्रेनले जवाफी कारबाही गर्ने अनुमान गरे।

‘कल्पना गर्नुहोस् एक हप्तापछि रुसीहरूले हामीलाई प्रहार गर्नेछन् र हामी उनीहरूतर्फ गोली चलाउनेछौँ, पूर्णरूपमा बुझ्न सकिन्छ र यो के हुनेछ?’, कसले पहिलो गोली चलायो भन्नेबारे वर्षौँको झगडाको अनुमान गर्दै उनले भने, ‘यसबाट कसलाई फाइदा हुनेछ? रुसीहरूलाई, तर निश्चित रूपमा हामीलाई होइन।’

आइतबारको वार्तालाई ‘धेरै शक्तिशाली सुरुआत’ भनेर वर्णन गर्दै जेलेन्स्कीले भने, ‘आगामी हप्ताहरूमा वार्ताहरूले अधिक कार्यान्वयनयोग्य योजना र युक्रेनको सुरक्षा ग्यारेन्टीहरू कस्तो देखिन सक्छ भन्नेबारे राम्रो बुझाइ प्रदान गर्नेछ।’

शुक्रबार वासिङ्टनमा भएको क्रोधित मुठभेडका क्रममा अमेरिकी राष्ट्रपति डोनाल्ड ट्रम्प र उपराष्ट्रपति जे डी भान्सले जेलेन्स्कीलाई ‘कृतज्ञ’ नभएको र उनीहरूको प्रस्तावित युद्धविराम शर्तहरू स्वीकार गर्न अस्वीकार गरेको आरोप लगाए। यद्यपि जेलेन्स्कीले आफूलाई सुरक्षा ग्यारेन्टी चाहिएको बताए।

विवादास्पद बैठकको परिणामस्वरूप जेलेन्स्की युक्रेनी खनिज अधिकारहरू साझा गर्नेबारे प्रारम्भिक सम्झौतामा हस्ताक्षर नगरिकन ह्वाइट हाउस छाडेका थिए।