वीरगञ्ज । अमेरिका र इरानबिचको तनाव पुनः उत्कर्षमा पुगेको छ । इरानका सर्वोच्च नेता मुजतबा खामेनेईले आफ्ना पिता तथा पूर्व सर्वोच्च नेता आयातुल्लाह अली खामेनेईको अमेरिका–इजरायलद्वारा गरिएको भनिएको हमलामा मृत्यु भएको घटनाको बदला अवश्य लिइने चेतावनी दिएका छन् ।

अन्तर्राष्ट्रिय सञ्चारमाध्यमहरूका अनुसार खामेनेईले बुबाको अन्त्येष्टिपछि जारी गरेको पहिलो सार्वजनिक सन्देशमा भने, “म आफ्ना पिताको निर्दोष रगतको बदला अवश्य लिनेछु । यो मेरो मात्र नभई सिङ्गो राष्ट्रको चाहना हो ।” उनले बदला लिनु अपरिहार्य रहेको उल्लेख गर्दै लक्षित व्यक्तिहरूको सूची तयार पारिएको दाबी पनि गरेका छन् ।

गत फेब्रुअरीको अन्त्यतिर अमेरिका–इजरायलको संयुक्त ठूलो हमलाबाट सुरु भएको द्वन्द्वबिच अली खामेनेईको मृत्यु भएको थियो । त्यसपछि मुजतबा खामेनेई इरानका सर्वोच्च नेता बनेका हुन् । युद्धविरामको अन्तरिम सहमति भए पनि पछिल्ला दिनमा दुवै पक्षबिच बयानबाजी तीव्र बनेको छ ।

यसैबिच, अमेरिकी राष्ट्रपति डोनाल्ड ट्रम्पले आफ्नो हत्या गर्ने कुनै पनि प्रयासविरुद्ध कडा चेतावनी दिएका छन् । सामाजिक सञ्जाल ‘ट्रुथ सोसल’ मार्फत ट्रम्पले इरानले आफूलाई लक्षित गरेर कुनै कदम चालेमा इरानलाई “संसारको नक्साबाटै पूर्ण रूपमा ध्वस्त पारिने” दाबी गरेका छन् । उनका अनुसार इरानतर्फ लक्षित एक हजार मिसाइलहरू तयारी अवस्थामा राखिएका छन् र आवश्यक परे थप हजारौँ मिसाइल प्रहार गर्न अमेरिका पछि नपर्ने चेतावनी दिएका छन् ।

तनाव बढ्दै जाँदा इरानी रिभोलुसनरी गार्ड्सले विश्व व्यापारका लागि अत्यन्त महत्त्वपूर्ण मानिने हर्मुज जलमार्ग पूर्ण रूपमा बन्द गर्ने घोषणा गरेको छ । इरानले आफ्नो पूर्व अनुमतिबिना कुनै पनि व्यावसायिक वा सैन्य जहाजलाई उक्त मार्ग प्रयोग नगर्न चेतावनी दिएको छ ।

अमेरिकी सेन्ट्रल कमान्डका अनुसार, हर्मुज जलमार्गमा साइप्रसको झन्डा फहराइरहेको एक मालवाहक जहाजमाथि इरानी आक्रमण भएपछि अमेरिकाले तेस्रो चरणको हवाई आक्रमण सुरु गरेको जनाएको छ ।

यता, कूटनीतिक प्रयास पनि जारी छन् । इरानी मिडियाका अनुसार कतारको एक प्रतिनिधिमण्डल तेहरान पुगेको छ र युद्धविराम बचाउन मध्यस्थकर्ताहरू सक्रिय छन् ।

मध्यपूर्वी क्षेत्रमा बढ्दो तनावले अन्तर्राष्ट्रिय समुदायमा चिन्ता बढाएको छ । विश्लेषकहरूका अनुसार हर्मुज जलमार्गमा अवरोध भएमा विश्व ऊर्जा आपूर्तिमा गम्भीर असर पर्न सक्नेछ ।