वीरगञ्ज । नेशनल इन्फोटेक कलेजद्वारा वीरगञ्जमा आयोजित चौथो संस्करणको नेशनल इन्फोटेक (एनआइ) कप – २०८१ ट्वान्टी-ट्वान्टी क्रिकेट प्रतियोगितामा लिग चरणअन्तर्गत बिहीबार भएको पहिलो खेलमा अल्पाइन हाई स्कुलले वीरगञ्ज कलेज (बीसीपीएल) लाई ९ विकेटले पराजित गर्दै शानदार जीत दर्ता गरेको छ ।
वीरगञ्जस्थित नारायणी क्रिकेट रङ्गशालामा आयोजित खेलमा अल्पाइन हाई स्कुलले बलियो प्रदर्शन र प्रभावकारी रणनीतिलाई आत्मसात् गरेर प्रतियोगितामा आफ्नो पहिलो जित दर्ता गरेको हो ।
टस जितेर पहिले ब्याटिङ गर्ने निर्णय गरेको वीरगञ्ज कलेजको इनिङ्स निराशाजनक रह्यो । अल्पाइन हाई स्कुलका बलरहरूको आक्रामक प्रदर्शनले वीरगञ्ज कलेजको पारीलाई १४.५ ओभरमा मात्र ६८ रनमा रोक्न सफल भयो । वीरगञ्ज कलेजका ब्याटरहरू टोलीलाई राम्रो सुरुवात दिन असफल रहे ।
वीरगञ्ज कलेजका लागि नितेश पटेलले १६ र सोहेल अन्सारीले ११ रन बाहेक अन्य कुनै पनि ब्याटरहरूले दोहोरो अङ्क पार गर्न सकेनन् । ओपनर ब्याटर ऋषि साहानीले १२ बलमा ९ रन बनाएर केही समय पिचमा टिके पनि अन्य ब्याटरहरू लगातार विकेट गुमाउँदै गए । टोलीका कप्तान र अनुभवी खेलाडीहरू समेत दबाबमा देखिए ।
अल्पाइन हाई स्कुलका बलरहरूको उत्कृष्ट संयोजनले वीरगञ्ज कलेजका ब्याटरहरूलाई टिक्न दिएन । अफ्रिदी आलमले ३.५ ओभरमा मात्र ९ रन खर्चेर ३ विकेट लिए । यसैगरी, रञ्जित चौहानले पनि ३ विकेट हात पारे । रोहित यादवले २ विकेट लिँदै वीरगञ्ज कलेजको पारीलाई छोट्ट्याउन महत्त्वपूर्ण भूमिका खेले भने मुस्कान मिश्रले १ विकेट लिए ।
सामान्य लक्ष्य पछ्याउन मैदानमा उत्रिएको अल्पाइन हाई स्कुलका ब्याटरहरूले सुरुदेखि नै आक्रामक खेल प्रस्तुत गरे । ओपनर रोहित यादवले २६ बलमा २६ रन बनाउँदै टोलीलाई बलियो सुरुवात दिलाए । उनले आफ्नो पारीमा १ चौका प्रहार गरे । अर्का ओपनर मनीष पटेल भने ७ बलमा ५ रन बनाएर आउट भए ।
अल्पाइनका अर्का स्टार खेलाडी अफ्रिदी आलमले ब्याटिङमा पनि उत्कृष्ट प्रदर्शन गरे । उनले १९ बलमा ३ चौकाको सहयोगमा २६ रन बनाए। उनको प्रदर्शनले टोलीलाई ८.४ ओभरमै लक्ष्य पूरा गर्न सक्षम बनायो । अल्पाइनले मात्र १ विकेटको क्षतिमा ७१ रन बनाउँदै खेल आफ्नो पक्षमा पार्यो ।
वीरगञ्ज कलेजका बलरहरूले कुनै प्रभाव पार्न सकेनन् । सन्देश बैठाले एक मात्र विकेट लिएर केही आशा देखाए पनि अन्य बलरहरू खर्चिला साबित भए । सन्देशले ३ ओभरमा २८ रन खर्चेर १ विकेट लिए । टोलीका अन्य बलरहरूमा खगेन्द्र दास, दीपक कुमार र सुरज पटेलले समग्रमा १७ डट बल मात्र फ्याँक्न सके ।
खेलले अल्पाइन हाई स्कुलको बलिङ र ब्याटिङ दुवै पक्षलाई उजागर गरेको छ । प्रतियोगितामा लगातार दुई हार बेहोर्दै आइरहेको अल्पाइन हाइ स्कुलका अफ्रिदी आलमले आफ्नो प्रदर्शनबाट टिमलाई जितसम्म पुर्याउन महत्त्वपूर्ण भूमिका निर्वाह गरे । उनी खेलका प्लेयर अफ द म्याच घोषित भए । बलिङतर्फ अफ्रिदी र रञ्जित चौहानको जोडीले वीरगञ्ज कलेजका ब्याटरहरूलाई तहसनहस बनायो ।
दोस्रोतर्फ, वीरगञ्ज कलेजले रणनीतिक रूपमा कमजोर प्रदर्शन गर्यो । ब्याटरहरूले संयम गुमाउनु र बलरहरूले लाइन तथा लेन्थमा स्थिरता कायम गर्न नसक्नु टोलीको तेस्रो हारको मुख्य कारण बन्यो ।
खेलले अल्पाइन हाई स्कुलको आगामी खेलहरूका लागि आत्मविश्वास बढाउनेछ । वीरगञ्ज कलेजका लागि भने आगामी खेलमा रणनीतिमा सुधार गर्नु आवश्यक छ ।
प्रतियोगिताअन्तर्गत आज दोस्रो खेल आयोजक नेशनल इन्फोटेक र ज्ञानदा एकेडेमीबिच दिउँसो १ बजेदेखि वीरगञ्जको नारायणी क्रिकेट रङ्गशालामा हुने छ ।
आशुकुमार सर्राफ
