वीरगञ्ज । नेपालमा सूचना प्रविधि शिक्षाको क्षेत्रमा स्थापित शैक्षिक संस्थामध्ये नेपाल सूचना प्रविधि महाविद्यालयले गुणस्तरीय, व्यवहारमुखी तथा अनुसन्धानमा आधारित शिक्षामार्फत आफ्नो छुट्टै पहिचान बनाउँदै आएको छ।

वि.सं. २०५८ मा स्थापना भएको महाविद्यालयमा हाल दुई हजारभन्दा बढी विद्यार्थी अध्ययनरत छन् भने सात हजारभन्दा बढी पूर्वविद्यार्थी स्वदेश तथा विदेशका विभिन्न सरकारी, निजी तथा अन्तर्राष्ट्रिय संस्थामा कार्यरत रहेका छन्।

महाविद्यालयमा स्नातक तथा स्नातकोत्तर तहका एक दर्जनजति शैक्षिक कार्यक्रम सञ्चालनमा रहेका छन्। अनुभवी पूर्णकालीन तथा आमन्त्रित प्राध्यापकमार्फत अध्यापन गरिँदै आएको महाविद्यालयले विद्यार्थीको रुचि, क्षमता र भविष्यको लक्ष्यअनुसार विषय छनोट गर्न प्रेरित गर्दै आएको जनाएको छ।

महाविद्यालयका प्रमुख निरञ्जन खकुरेलका अनुसार सफ्टवेयर निर्माण, सङ्केत लेखन तथा डिजिटल प्रणाली विकासमा रुचि भएका विद्यार्थीका लागि सफ्टवेयर इन्जिनियरिङ उपयुक्त विषय हो। त्यस्तै कम्प्युटर प्रणाली, अनुसन्धान तथा नयाँ प्रविधिको विकासमा रुचि राख्नेका लागि कम्प्युटर इन्जिनियरिङ उपयुक्त हुने उनले बताए।

त्यसैगरी सञ्चार सञ्जाल, तथ्याङ्क केन्द्र, दूरसञ्चार तथा इन्टरनेट सेवासँग सम्बन्धित क्षेत्रमा भविष्य बनाउन चाहने विद्यार्थीका लागि सूचना प्रविधि इन्जिनियरिङ तथा व्यवस्थापन र सूचना प्रविधिलाई सँगसँगै अध्ययन गर्न चाहनेका लागि कम्प्युटर प्रयोगसम्बन्धी स्नातक कार्यक्रम प्रभावकारी विकल्पका रूपमा रहेको महाविद्यालयले जनाएको छ।

महाविद्यालयले पाठ्यपुस्तकमा आधारित शिक्षासँगै व्यवहारिक अभ्यास, परियोजना निर्माण, अनुसन्धान तथा उद्योगसँगको प्रत्यक्ष सहकार्यलाई विशेष प्राथमिकता दिएको छ। यसका लागि विभिन्न अन्तर्राष्ट्रिय शैक्षिक संस्थासँग सहकार्य गर्दै विद्यार्थीलाई व्यावसायिक तालिम तथा अन्तर्राष्ट्रिय प्रमाणपत्र प्राप्त गर्ने अवसरसमेत उपलब्ध गराइँदै आएको छ।

नियमित रूपमा गोष्ठी, प्राविधिक प्रतियोगिता, प्रदर्शनी, अनुसन्धान सम्मेलन तथा प्रविधि महोत्सव आयोजना गर्दै आएको महाविद्यालयले अनुसन्धानमुखी शैक्षिक वातावरणलाई थप प्रभावकारी बनाउँदै लगेको जनाएको छ।

महाविद्यालयले अनुसन्धान र उद्यमशीलतालाई समान महत्व दिँदै विद्यार्थी तथा शिक्षकका अनुसन्धानमूलक लेख विभिन्न अनुसन्धान पत्रिकामा प्रकाशित गर्दै आएको छ। साथै उद्यमशीलता प्रवर्द्धन कार्यक्रममार्फत विद्यार्थीका नवीन सोचलाई व्यवसायमा रूपान्तरण गर्न आवश्यक सहयोग प्रदान गरिरहेको जनाएको छ।

महाविद्यालयमा स्थापना गरिएको नवप्रवर्तन केन्द्रमार्फत विद्यार्थीलाई परामर्श, व्यावसायिक सञ्जाल विस्तार तथा व्यवसाय विकासका लागि आवश्यक मार्गदर्शन उपलब्ध गराइँदै आएको छ। हाल दुई दर्जनजति नवप्रवर्तनमा आधारित परियोजना विभिन्न चरणमा सञ्चालनमा रहेका छन्।

विद्यार्थीलाई अध्ययनकै क्रममा व्यवहारिक अनुभव दिलाउने उद्देश्यले पाँचौँ वा छैटौँ अध्ययन अवधिदेखि नै उद्योग तथा विभिन्न संस्थामा कार्यअनुभव कार्यक्रमको अवसर उपलब्ध गराइएको महाविद्यालयले जनाएको छ। यसबाट विद्यार्थीको रोजगारी क्षमता वृद्धि हुनुका साथै अध्ययनपछि रोजगारी प्राप्त गर्न सहज भएको दाबी गरिएको छ।

शैक्षिक उपलब्धिका दृष्टिले पनि महाविद्यालयले उल्लेखनीय सफलता हासिल गर्दै आएको छ। विभिन्न प्रतिष्ठित सम्मान तथा स्वर्ण पदक प्राप्त गर्नुका साथै सूचना प्रविधि र इन्जिनियरिङ अध्ययनतर्फ उत्कृष्ट नतिजा हासिल गर्ने विद्यार्थी उत्पादन गर्दै आएको महाविद्यालयको भनाइ छ।

महाविद्यालयका अनुसार आधुनिक पूर्वाधार, अनुसन्धानमैत्री वातावरण, उद्योगसँगको सहकार्य, व्यवहारिक शिक्षण प्रणाली, उद्यमशीलतालाई प्रोत्साहन तथा पूर्वविद्यार्थीको बलियो सञ्जालका कारण यसले सूचना प्रविधि तथा इन्जिनियरिङ शिक्षामा अग्रणी संस्थाका रूपमा आफ्नो पहिचान स्थापित गरेको छ।

नेपालको डिजिटल भविष्य निर्माण गर्न सक्षम प्राविधिक जनशक्ति उत्पादन गर्ने लक्ष्यसहित अघि बढिरहेको महाविद्यालयले आगामी शैक्षिक सत्रका लागि स्नातक तहको प्रवेश परीक्षा असार २१ गते सञ्चालन गर्ने जनाएको छ।