वीरगञ्ज । नेपालमा यस वर्षको मनसुन औसत समयभन्दा ६ दिन ढिलो गरी प्रवेश गरेसँगै मौसम प्रणाली क्रमशः सक्रिय बन्दै गएको छ । जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार हाल मनसुनी वायु मुख्यतः कोसी प्रदेशमा सक्रिय रहे पनि मधेस प्रदेशसहित देशका अन्य भू–भागमा स्थानीय तथा पूर्वीय वायुको आंशिक प्रभाव देखिएको छ ।

महाशाखाका अनुसार आज मधेस प्रदेशमा आंशिक बदली रहनेछ । प्रदेशका एक–दुई स्थानमा मेघगर्जन तथा चट्याङसहित हल्कादेखि मध्यम वर्षाको सम्भावना रहेको छ । विशेषगरी दिउँसो र साँझपख मौसम बदली भई क्षणिक वर्षा हुन सक्ने अनुमान गरिएको छ ।

यद्यपि मधेसका अधिकांश तराई भू–भागमा अझै पूर्ण रूपमा मनसुन सक्रिय भइसकेको छैन । त्यसैले वर्षा व्यापक नभई छिटपुट मात्र हुने देखिएको छ । केही क्षेत्रमा तापक्रम उच्च नै रहने भएकाले गर्मीको महसुस कायमै रहनेछ ।

आज राति पनि मधेस प्रदेशका एक–दुई स्थानमा मेघगर्जनसहित हल्का वर्षाको सम्भावना रहेको महाशाखाले जनाएको छ । अन्य स्थानमा भने मौसम सामान्यतया आंशिक बदलीदेखि मुख्यतया सफा रहनेछ ।

यस वर्ष मनसुन प्रणाली असार ५ गते कोसी प्रदेशबाट नेपाल प्रवेश गरेको हो । सामान्यतया नेपालमा मनसुन जेठ ३० गतेसम्म भित्रिने गर्छ । यस पटक प्रशान्त महासागर क्षेत्रमा विकसित ‘एल निनो’ प्रणालीको प्रभावका कारण मनसुन ढिलो प्रवेश गरेको मौसमविद्हरूले बताएका छन् ।

महाशाखाका अनुसार हाल मनसुनी प्रणाली कमजोर अवस्थामा रहेकाले देशभर फैलिन अझै केही दिन लाग्न सक्छ । क्रमशः सक्रिय बन्दै गएपछि मधेस प्रदेशलगायत अन्य प्रदेशमा वर्षाको मात्रा बढ्ने अनुमान गरिएको छ ।

हाल कोसी, बागमती र गण्डकी प्रदेशका पहाडी भू–भागका थोरै स्थानमा हल्का वर्षा भइरहेको छ । कोसी प्रदेशका केही स्थानमा तथा बागमती र गण्डकीका पहाडी क्षेत्रमा मेघगर्जन/चट्याङसहित मध्यम वर्षाको सम्भावना रहेको छ ।

कोसी र गण्डकी प्रदेशका पहाडी भू–भाग तथा कोसीको तराई क्षेत्रका एक–दुई स्थानमा भारी वर्षाको समेत सम्भावना औँल्याइएको छ ।

यसैबिच, लुम्बिनी र सुदूरपश्चिम प्रदेशका तराई भू–भागका केही स्थानमा तातो लहर चल्ने सम्भावना रहेको छ भने बागमती र गण्डकी प्रदेशका तराई क्षेत्रमा पनि तातो दिन हुन सक्ने अनुमान गरिएको छ ।

महाशाखाले मेघगर्जन, चट्याङ तथा वर्षासँगै हुने सम्भावित जोखिमबाट जोगिन सर्वसाधारणलाई सतर्क रहन आग्रह गरेको छ । विशेषगरी मधेस प्रदेशका खुला क्षेत्र, खेतीपातीमा संलग्न किसान तथा यात्रा गर्नेहरूले मौसमको नियमित जानकारी लिनुपर्ने सुझाव दिइएको छ ।

पहाडी क्षेत्रमा पहिरो र तराई क्षेत्रमा डुबानको जोखिम बढ्न सक्ने भएकाले स्थानीय तह र सम्बन्धित निकायलाई आवश्यक तयारी अवस्थामा रहन पनि आग्रह गरिएको छ ।

मौसम पूर्वानुमान महाशाखाले मनसुनको गतिविधिबारे निरन्तर निगरानी भइरहेको जनाएको छ र आवश्यकताअनुसार अद्यावधिक सूचना सार्वजनिक गरिने जानकारी दिएको छ ।