वीरगञ्ज । बहुदरमाई नगरपालिका–७ का वडाध्यक्षले प्रयोग गर्दै आएको सरकारी मोटरसाइकलको दुरुपयोग भएको आरोप लागेको छ ।

स्थानीय स्रोतका अनुसार बहुदरमाई नगरपालिका–७ का वडाध्यक्ष वीरेन्द्र प्रसाद यादवले प्रयोग गर्ने नं. ना १ प ३५०७ नम्बरको सरकारी मोटरसाइकलमा दुई बोरा मल बोकेर लगिएको देखिएको भन्दै स्थानीयवासीले प्रश्न उठाएका छन् ।

स्थानीयले सरकारी सवारीसाधन व्यक्तिगत प्रयोजनमा प्रयोग गरिएको हुन सक्ने आशङ्का व्यक्त गर्दै सम्बन्धित निकायबाट घटनाको सत्यतथ्य छानबिन गर्न माग गरेका छन् । सरकारी साधनको प्रयोग तोकिएको कार्यका लागि मात्र हुनुपर्ने भए पनि व्यक्तिगत वा अन्य प्रयोजनमा प्रयोग भएको हो वा होइन भन्ने विषयमा स्पष्ट हुन आवश्यक रहेको उनीहरूको भनाइ छ ।

यद्यपि, यस विषयमा वडाध्यक्ष वीरेन्द्र प्रसाद यादव वा बहुदरमाई नगरपालिकाको आधिकारिक प्रतिक्रिया प्राप्त हुन सकेको छैन । सरकारी मोटरसाइकलमा मल बोकेको भनिएको घटना कुन प्रयोजनका लागि भएको थियो भन्ने विषय पनि खुल्न बाँकी छ ।

स्थानीयवासीले घटनाबारे निष्पक्ष छानबिन गरी वास्तविकता सार्वजनिक गर्न तथा सरकारी सम्पत्तिको प्रयोग पारदर्शी बनाउन सम्बन्धित निकायको ध्यानाकर्षण गराएका छन् ।