बारा । बाराको जितपुरसिमरा उपमहानगरपालिका–९ छातापिप्रास्थित त्रिवेणी स्पिनिङ धागो उद्योगमा शुक्रबार बिहान आगलागी भएको छ। आगलागीको प्रारम्भिक कारण विद्युत् सर्ट भएको अनुमान गरिए पनि वास्तविक कारणबारे आधिकारिक निष्कर्ष आउन बाँकी रहेको प्रहरीले जनाएको छ।

जिल्ला प्रहरी कार्यालय बाराका अनुसार बिहान करिब १०ः४० बजे उद्योगमा आगलागी भएको सूचना प्राप्त हुनासाथ इलाका प्रहरी कार्यालय जितपुरबाट प्रहरी सहायक निरीक्षक तेजनारायण बैठाको नेतृत्वमा ६ जना, इलाका प्रहरी कार्यालय सिमराबाट प्रहरी सहायक निरीक्षक सुरेन्द्र यादवको नेतृत्वमा ४ जना तथा औद्योगिक सुरक्षा बेस सशस्त्र प्रहरी बल जितपुरबाट सशस्त्र प्रहरी नायब निरीक्षक एकवाल यादवको नेतृत्वमा ५ जना सुरक्षाकर्मी घटनास्थल पुगेका थिए।

आगो नियन्त्रणका लागि जितपुरसिमरा उपमहानगरपालिका, कलैया उपमहानगरपालिका, अमलेखगञ्जस्थित नेपाल आयल निगम तथा वीरगञ्ज महानगरपालिकाका दमकल परिचालन गरिएको थियो। पाँचवटा दमकल, सुरक्षाकर्मी र स्थानीयवासीको सक्रिय प्रयासमा आगो नियन्त्रणको कार्य जारी रहेको प्रहरीले जनाएको छ।

घटनाबाट भएको क्षतिको विस्तृत विवरण भने हालसम्म सार्वजनिक भएको छैन। उद्योगभित्र रहेका कच्चा पदार्थ, मेसिनरी उपकरण तथा भौतिक संरचनामा कति क्षति पुगेको छ भन्ने विषय आगो पूर्ण रूपमा नियन्त्रणमा आएपछि मात्रै यकिन हुने बताइएको छ।

प्रहरीका अनुसार आगलागीको वास्तविक कारण पत्ता लगाउन आवश्यक अनुसन्धान प्रक्रिया अगाडि बढाइनेछ। प्रारम्भिक अनुमानका आधारमा निष्कर्षमा पुग्नुभन्दा प्राविधिक परीक्षण तथा अनुसन्धान प्रतिवेदनपछि मात्रै घटनाको कारण स्पष्ट हुने जनाइएको छ।

आगलागीको कारण, क्षतिको परिमाण तथा अन्य सम्बन्धित पक्षबारे विस्तृत जानकारी अनुसन्धान सम्पन्न भएपछि सार्वजनिक गरिने प्रहरीले जनाएको छ।