वीरगञ्ज । बारा जिल्लामा नेपाल प्रहरीका कार्यालय सहयोगी राजकुमार रुम्बाको हत्यामा संलग्न रहेको आरोपमा जिल्ला प्रहरी कार्यालय बाराले तिन जनालाई नियन्त्रणमा लिएर सार्वजनिक गरेको छ । जिल्लाको जितपुरसिमरा उपमहानगरपालिका – ११ स्थित बकुलिया–रमौली लोसन्डा सडक खण्डको छेउमा विद्युतीय कारमा मृत भेटिएका प्रहरीका कार्यालय सहयोग रुम्बाको हत्यामा संलग्न रहेको आरोपमा राष्ट्रिय अनुसन्धान विभागका अधिकृतसहित तिन जनालाई नियन्त्रणमा लिएर बारा प्रहरीले सार्वजनिक गरेको हो ।
पक्राउ पर्नेमा २७ वर्षीय पुरुषोत्तम कुमार दास, २० वर्षीय ईन्द्रजित कुमार चौहान, र राष्ट्रिय अनुसन्धान विभागका अनुसन्धान अधिकृत श्रीकान्त तिवारी रहेका छन् । दास जय माँ इन्जिनियरिङ वर्कसपका सञ्चालक हुन् भने चौहान कुमार चौहान जितपुरसिमरा उपमहानगरपालिका – १९ का बासिन्दा हुन् । तिवारी भने महोत्तरी जिल्ला जलेश्वर नगरपालिका – ३ निवासी हुन् र सिमरास्थित विमानस्थल कार्यालयमा कार्यरत थिए ।
राजकुमार रुम्बाको हत्याको विवरण
२०८१ पुस ६ गते बिहान करिब सवा ९ बजे बारा जिल्लाको जितपुरसिमरा उपमहानगरपालिका – १९ स्थित बकुलिया–रमौली लोसन्डा सडक खण्डको छेउमा एउटा खैरो रङ्गको विद्युतीय गाडी (बागमती प्रदेश ०१-०२८ च ७६१६) पार्क गरिएको अवस्थामा भेटियो । गाडीभित्र चालक सिटमा एक व्यक्ति बेहोस अवस्थामा रहेको खबर प्रहरीलाई प्राप्त भयो ।
घटनास्थलमा पुगेको प्रहरी टोलीले प्रारम्भिक अनुसन्धान गर्दा गाडीभित्र मृतकको पहिचान राज कुमार रुम्बाका रूपमा गर्यो । मृतक बारा जिल्लाको जितपुरसिमरा उपमहानगरपालिका – १ निवासी थिए । उनी इलाका प्रहरी कार्यालय सिमरामा कार्यरत प्रहरी कार्यालय सहयोगी थिए र विमानस्थल सुरक्षा गार्डका रूपमा सेवा दिइरहेका थिए ।
मृतकको शव परीक्षणको क्रममा उनको टाउकोमा गोली प्रहार भएको पत्ता लाग्यो । प्रतिवेदनले मृत्यु टाउको गोली लाग्नुको कारण भएको पुष्टि गर्यो । घटनास्थल र प्रकृति हेर्दा रुम्बाको मृत्यु साधारण नभई योजनाबद्ध हत्या भएको सङ्केत देखियो ।
हत्याको कारण व्यक्तिगत रिसइवी
प्रहरीका अनुसार दास र रुम्बाबीच करिब डेढ महिनाअघि विवाद भएको थियो । उक्त विवादकै कारण दासले रुम्बालाई हत्या गर्ने योजना बनाएको खुलेको छ । रुम्बाको हत्या गर्न दासले भारतको मोतिहारीबाट १८ हजार नेपाली रुपैयाँमा पेस्तोल किनेर समेत मगाएको अनुसन्धानबाट पत्ता लागेको छ ।
घटनाको रात रुम्बा आफ्नो घरमा पुगेका थिए । राति ९ बजे चौहानले फोन गरी ‘जरुरी कामले कलैया जानुपर्ने’ भन्दै तिवारीको कार लिएर आउन आग्रह गरे । फोन सुरुमा रुम्बाका छोराले उठाएका थिए । चौहानले बारम्बार आग्रह गरेपछि रुम्बा आफैँ कार लिएर चौहानलाई भेट्न राजी भए ।
रातोपुलमा पुगेपछि चौहान गाडीमा चढे । सोही ठाउँमा पैदल हिँडिरहेका दासलाई पनि गाडीमा राख्न चौहानले आग्रह गरे । रुम्बाले आफ्नो बोलचाल नभएको जनाए पनि दासलाई गाडीमा चढ्न अनुमति दिए । त्यसपछि उनीहरू जीतपुरबाट बकुलिया हुँदै आमाडारतर्फ लागे ।
आमाडारको एकान्त स्थानमा पुगेपछि चौहानले गाडी रोक्न आग्रह गरे । गाडी रोकिएपछि चौहान बाहिर निस्किए । यही मौका छोप्दै पछाडिको सिटमा रहेका दासले रुम्बाको टाउकोमा गोली प्रहार गरे । घटनापछि उनीहरूले रुम्बाको घाँटीमा रहेको सिक्री र पर्स लिएर फरार भए ।
दासले घटनापछि मोबाइलको सिम झिकेर दाँतले टुक्रा पारी दुधौरा खोलामा फाले । साथै, मोबाइल जलाएर प्रमाण नष्ट गर्न खोजे । उनीहरू फरार हुने क्रममा पेस्तोल खसालेर भागे । पछि पेस्तोल खोज्न फर्किए पनि त्यहाँ मोटरसाइकल आउँदै गरेको देखेपछि पुनः भागे ।
पुस ११ गते जीतपुरसिमरास्थित एक बैंकमा चेक साट्न गएका बेला दासलाई प्रहरीले पक्राउ गर्यो । उनको खल्तीबाट रुम्बाको सिक्री बरामद भएको प्रहरीको दाबी छ । थप अनुसन्धानका क्रममा दासको वर्कसपको कोठामा रहेको झोलाबाट रुम्बाको पर्स फेला परेको बारा प्रहरीका प्रमुख प्रहरी उपरीक्षक (एसपी) महेन्द्र खड्काले जनाएका छन् । दासका बयानका आधारमा चौहानलाई पनि प्रहरीले पक्राउ गरेको छ । दुवैले घटनामा संलग्नता रहेको स्वीकारेका छन् ।
रुम्बाको शव तिवारीकै कारमा फेला परेपछि उनी पनि अनुसन्धानको घेरामा परेका हुन् । पीडित परिवारले तिवारीमाथि किटानी जाहेरी दिएका थिए । तिवारीले कारको साँचो रुम्बालाई दिएको स्वीकारेका छन् । तर, हालसम्मको अनुसन्धानमा उनी दोषी प्रमाणित नभएको एसपी खड्काले जानकारी दिए ।
दासले डेढ महिनाअघि रुम्बासँग भएको विवादपछि हत्या योजना बनाएका थिए । उनले भारतबाट पेस्तोल ल्याएर एक महिनासम्म योजना बनाएका थिए । घटनाका लागि चौहानसँगको सहकार्यमा कार भाडामा लिएर रुम्बालाई बोलाउने योजना तय भएको थियो ।
प्रहरीले घटनाको अनुसन्धानलाई तीव्रता दिएको छ । बारा जिल्ला अदालतले पक्राउ परेका तीन जनालाई एक साता थुनामा राखेर अनुसन्धान गर्न अनुमति दिएको छ । प्रहरीका अनुसार घटनाको पछाडि रहेका अन्य सम्भावित कारणहरूको खोजी गर्न थप अनुसन्धान जारी छ ।
हत्या गरिएका रुम्बा जीतपुरसिमरा–१ स्थित घरमा दुई श्रीमती, एक छोरी र दुई छोरासहित बस्दै आएका थिए । घटनापछि पीडित परिवारले न्यायका लागि प्रहरीलाई दबाब दिएका छन् ।
घटनाले व्यक्तिगत विवादले कसरी अपराधमा परिणत हुन सक्छ भन्ने देखाएको छ । साथै, यसले सुरक्षा निकायका कर्मचारीबिचको सम्बन्ध र जिम्मेवारीका सवालमा पनि गम्भीर प्रश्न उठाएको छ । प्रहरीको अनुसन्धानले अपराधमा संलग्न सबैलाई कानुनी दायरामा ल्याउने आशा गरिएको छ ।
आशुकुमार सर्राफ
