तस्बिर सौजन्य ।
दिल्ली । दिल्लीको इतिहासमा अहिलेसम्मकै ठूलो लागूऔषध बरामद भएको घटनामा ५६० केजीभन्दा बढी कोकिन र ४० केजी गाँजा फेला परेको छ, जसको अन्तर्राष्ट्रिय बजार मूल्य ५,००० करोड भारतीय रुपैयाँभन्दा बढी छ । दिल्लीको महिपालपुरस्थित एक गोदाममा प्रहरीले छापा मारेर लागूऔषधसहित चार जनालाई पक्राउ गरेको हो ।
घटनाको मुख्य अभियुक्त तुषार गोयललाई बताइएको छ, उनी दिल्ली मै रहेको तुषार पब्लिकेसन र ट्युलिप पब्लिकेसनका सञ्चालक हुन् । प्रहरीले विगत चार महिनादेखि उनीमाथि निगरानी गरिरहेको जनाएको छ ।
प्रहरीको तीन महिने अनुसन्धान पछि यो सफलता हात लागेको हो । प्रहरी अनुसार, दक्षिण अमेरिकी देशबाट मध्यपूर्व हुँदै भारतमा कोकिन ल्याइएको थियो । लागू औषधहरूलाई विशेष गरी पर्वहरूमा दिल्ली र एनसीआर क्षेत्रमा वितरण गर्ने योजना बनाइएको थियो । यस घटनामा नशा आतङ्कवादको कोणबाट पनि अनुसन्धान भइरहेको छ ।
अहिले यो घटनामा पाँचौँ व्यक्ति, जितेन्द्र पाल सिंह उर्फ जस्सीलाई पक्राउ गरिएको छ । उनलाई पञ्जाबको अमृतसर विमानस्थलबाट बेलायत भाग्न खोज्दै गर्दा पक्राउ गरिएको हो । प्रहरीका अनुसार, सिंहले भारतमा तस्करीको निगरानी गर्न लन्डनबाट यात्रा गरेका थिए । प्रहरीले ‘लुकआउट नोटिस’ जारी गरेपछि सिंह पक्राउ परेका हुन् ।
सिंह विगत १७ वर्षदेखि बेलायतमा स्थायी बासिन्दा भएका भारतीय नागरिक हुन् । उनलाई मुख्य अभियुक्त गोयलका पुराना साथी वीरेन्द्र बसोयाद्वारा तस्करीको सञ्जालमा तानिएको थियो । बसोया हाल दुबईमा बस्ने भारतीय नागरिक हुन्, जो यस गिरोहको प्रमुख योजनाकार हुनसक्ने अनुमान गरिएको छ ।
प्रहरीको अनुसन्धानले यस गिरोहको सम्बन्ध मुम्बईको सङ्गठित अपराध नेटवर्कसँग पनि रहेको आशङ्का गरेको छ । यसबाहेक, बसोयाको सम्बन्ध कुख्यात अपराधी दाऊद इब्राहिमको ‘डी-कम्पनी’सँग पनि हुन सक्ने अनुसन्धान भइरहेको छ ।
यस घटनाले भारतभर फैलिएको एक ठूलो लागूऔषध तस्करी सञ्जाललाई उजागर गरेको छ । प्रहरी थप अनुसन्धान र कारबाही गर्दै यो सञ्जाललाई ध्वस्त पार्न सक्रिय रहेको छ ।
एजेन्सी
