वीरगञ्ज । हिन्दु धर्मावलम्बीले वीरगञ्जमा पनि मर्यादा पुरुषोत्तम श्रीरामको जन्मोत्सव शोभा यात्रासहित मनाएका छन् ।

वीरगञ्ज – १० घडिअर्वास्थित श्री रामजानकी मन्दिर तदर्थ समितिको आयोजनामा मुलुकका अन्य ठाउँमा जस्तै वीरगञ्जको घडीअर्वा पोखरीमा रहेको रामजानकी मन्दिरमा पनि आज बिहान धार्मिक कार्यक्रमसहित राम नवमी एवम् शोभा यात्रा महोत्सव आयोजना गरिएको हो ।

बुधवार बिहान श्री रामजानकी मन्दिरबाट हजारौँको सहभागितामा निस्किएको वृहत् सोभा यात्रासहितको झाँकीले नगर परिक्रमा गरेको थियो । वीरगञ्ज महानगरपालिकाका नगरप्रमुख राजेशमान सिंह, वीरगञ्ज – १० का वडाध्यक्ष सुशील कुमार कानु लगायत स्थानीयहरूको सहभागितामा निस्केको यात्रा नगर परिक्रमा गरी पुनः मन्दिरमा पुगेर सम्पन्न भएको थियो ।

रामजानकी मन्दिरका मूल पुरोहित शम्भुनाथ तिवारीले मुलुकको अन्य ठाउँमा जस्तै वीरगञ्जको रामजानकी मन्दिरमा पनि भव्य कार्यक्रमसहित मर्यादा पुरुषोत्तम श्रीरामको जन्मोत्सव दिनभर विभिन्न कार्यक्रम गरेर मनाइने जानकारी दिए । 

‘हामीले धार्मिक परम्पराअनुसार नै श्रीराम भगवान्को जन्मोत्सव मनाउँदै छौँ’, उनले भने, ‘गत माघ ८ गते भारतको अयोध्या मन्दिरमा जस्तै वीरगञ्जको घडीअर्वा पोखरीसँगै रहेको श्री रामजानकी मन्दिरमा राम दरबार तथा बजरङ्ग बली प्रतिमाको प्राण प्रतिष्ठा गरिएको थियो । यसले गर्दा पनि यसको पनि छुट्टै महत्त्व बढाइरहेको छ ।’

नगरप्रमुख सिंहले वीरगञ्जलाई धार्मिक पर्यटकीय स्थलका रूपमा स्थापित गर्ने हेतुले विभिन्न कार्यक्रम गर्दै आएको बताए । उनले भने, ‘ओझेलमा परेका धार्मिक स्थलको जीर्णोद्धार गरेर विभिन्न पर्व तथा मेला आयोजना गर्दै आएका छौँ । यसले एकातर्फ सामाजिक सद्भाव बढाउने काम गरिरहेको छ । अर्कोतर्फ स्वदेशी तथा छिमेकी मुलुक भारतका पर्यटकको कसरी पर्सामा बसाइ लम्ब्याउनेतर्फ केन्द्रित हुँदै आएका छौँ ।’

शोभा यात्रा झाँकीसहित बिहान ७ बजे निकालिएको थियो । शोभा यात्रा वीरगञ्जका मुख्य बजार क्षेत्र परिक्रममा गरेर मन्दिर प्राङ्गणमा आएको थियो । मन्दिरका मूल पुरोहितले बिहानैदेखि धार्मिक परम्पराअनुसार पूजाआजा गरेको बताए । यो मन्दिर ७५ वर्षअघि स्थापना भएको बताइएको छ । रामजानकी मन्दिर तदर्थ समितिका अनुसार मध्याह्न १२ बजे प्रसाद वितरण कार्यक्रम छ भने अपराह्न ४ बजे रामायण झाँकी हुनेछ । साँझ साढे ६ बजे आरती समाप्तिपछि प्रसाद वितरण हुनेछ ।