वीरगञ्ज । मधेश प्रदेशको प्रदेश सभा बैठकमा नेपाली कांग्रेस र जनमत पार्टीले अवरोध गरेका छन् । कांग्रेस र जनमत पार्टीका प्रदेश सभा सदस्यहरुले वेलअगाडि नाराबाजी गरेर बैठकमा अवरोध गरेका हुन् ।
कार्यव्यवस्था परामर्श समितिको बैठक नबोलाएको र सप्तरी घटनाको छानबिन गर्न मुख्यमन्त्री सरोजकुमार यादव तयार नभएको भन्दै कांग्रेस र जनमतले आपत्ती जनाएका छन् ।
सप्तरीको राजविराजमा मधेश कृषि विश्वविद्यालय शिलान्यासका क्रममा तत्कालीन शिक्षामन्त्री जनमत पार्टीका महेश यादवमाथि कुटपिट भएको घटना छानबिन गर्न मुख्यमन्त्री तयार नभएको प्रदेश सांसदहरुले आरोप लगाएका छन् ।
दुवै दलले अवरोध गरेपछि सभामुख रामचन्द्र मण्डलले १० मिनेटका लागि बैठक स्थगित गरेका छन् । बैठक स्थगित भएसँगै सभामुख मण्डल सबै राजनीतिक दलका प्रमुख सचेतकहरुसँग छलफलमा जुटेका छन् ।
मुख्यमन्त्री यादवले प्रदेससभा बैठकमा विश्वासको मत लिने कार्यसूची रहेको छ । सरकारमा सहभागी कांग्रेस ९ चैतमा समर्थन फिर्ता लिएपछि मुख्यमन्त्री यादवले विश्वासको मत लिन लागेका हुन् ।
मुख्यमन्त्री नियुक्त भएयता एकै कार्यकालमा उनले चाथौंपटक विश्वासको मत लिन लागेका हुन् ।
यात्रा डेली
