वीरगञ्ज। वीरगञ्ज महानगरपालिकाका नगर प्रमुख राजेशमान सिंहले आगामी ‘एलिट कप’ अर्थात् ‘जय शाह राष्ट्रिय प्रतियोगिता’को तयारीका क्रममा वीरगञ्जस्थित नारायणी क्रिकेट मैदानको निरीक्षण भ्रमण सम्पन्न गरेका छन्।

भ्रमणको क्रममा मेयर सिंहले मैदानको भौतिक संरचना, खेलाडीहरूका लागि उपलब्ध सुविधाहरू तथा प्रतियोगिता व्यवस्थापनका पक्षहरूको अवलोकन गरेका हुन्।

भ्रमणका क्रममा सिंहले मैदान विकास कार्यलाई तीव्रता दिइरहेको टोलीसँग छलफल गर्दै निर्माण कार्यलाई गति दिन आग्रह गरे। हाल बंगलादेशबाट आएका अनुभवी मैदान निर्माण विशेषज्ञहरूको टोलीले मैदानको सुधार र निर्माण कार्यमा संलग्न रहेको जानकारी प्राप्त भएको छ।

क्रिकेट एसोसिएसन अफ पर्साका अध्यक्ष मनिष सिंहका अनुसार, वीरगञ्ज महानगरपालिकाले मैदानको सुधार कार्यमा विशेष आर्थिक सहयोग गरेको छ। सिंहले आगामी एलिट कपमा राष्ट्रिय स्तरका चार टोलीले प्रतिस्पर्धा गर्ने र प्रतियोगिता सफलतापूर्वक सम्पन्न गर्नका लागि तयारीलाई प्रभावकारी रूपमा अघि बढाइएको बताए।

यसका साथै, क्रिकेट एसोसिएसन अफ पर्साका उपाध्यक्ष मुर्तुजा हवारी र अन्य स्थानीय प्रतिनिधिहरूले पनि मैदानको तयारी र प्रतियोगिता आयोजनामा महत्वपूर्ण भूमिका निर्वाह गरिरहेका छन्।

नारायणी क्रिकेट मैदानमा भइरहेको निर्माण र सुधार कार्यले यस वर्षको एलिट कपलाई अझ भव्य र व्यवस्थित बनाउने अपेक्षा गरिएको छ। प्रतियोगितामा देशभरका उत्कृष्ट टोलीहरूको सहभागिता रहनेछ, जसले नेपाली क्रिकेटको विकासमा महत्वपूर्ण भूमिका खेल्ने विश्वास गरिएको छ।