वीरगञ्ज। संघीय मामिला तथा सामान्य प्रशासन मन्त्री राजकुमार गुप्ताले देशको समृद्धि र विकासका लागि सबै राजनीतिक दल एकजुट हुनुपर्नेमा जोड दिएका छन्। पर्साको पकाहामैनपुर गाउँपालिकामा आयोजित शुभकामना आदानप्रदान कार्यक्रममा बोल्दै मन्त्री गुप्ताले आफ्नो पालिका र जिल्लाको विकासका लागि राजनीतिक आस्थाभन्दा माथि उठेर एकता कायम गर्नु अपरिहार्य रहेको बताए।

कार्यक्रमका क्रममा मन्त्री गुप्ताले पर्सा जिल्ला कृषि योग्य रहेको उल्लेख गर्दै, यहाँको कृषि उत्पादनलाई प्रवर्द्धन गर्न र बजारीकरणमा सहयोग पुर्‍याउनका लागि कोल्ड स्टोरको निर्माण सुरु गरिएको जानकारी दिए। उनले भने, “कोल्ड स्टोर सञ्चालन भएसँगै यस क्षेत्रको खाद्य आपूर्ति मात्रै नभई कृषि उत्पादनको बजारीकरणमा महत्त्वपूर्ण योगदान हुनेछ।”

यसै क्रममा मन्त्री गुप्ताले धोबिया टोल हुँदै लहवारथकरी जोड्ने सडक निर्माणका लागि टेन्डर आह्वान भइसकेको जानकारी पनि गराए। काम चाँडै सम्पन्न भएमा यस क्षेत्रको व्यापार तथा समग्र विकासमा अभूतपूर्व उपलब्धि हासिल हुने उनको भनाइ थियो। उनले यस कार्यमा स्थानीय प्रशासन र राजनीतिक दललाई सचेततापूर्वक सहयोग गर्न आग्रह गरे।

मन्त्री गुप्ताको यो भनाइले पर्सा जिल्लाको समग्र विकासका लागि सबै पक्षको सहभागिता र एकताका महत्वलाई पुनः उजागर गरेको छ।