वीरगञ्ज। दशैं पर्व सुरु भइसकेको छ, र यसलाई रातो टीका र जमारासँगै मान्यजनबाट आशीर्वाद लिने पर्वका रूपमा मात्र होइन, अत्यधिक मासु खाने पर्वको रूपमा पनि लिने गरिन्छ। दशैंको विशेषता भनेकै विभिन्न प्रकारका मासुका परिकारहरू तयार पारेर स्वाद लिनु हो। तर, यही अत्यधिक मासु तथा अन्य परिकारहरूको अत्यधिक सेवनले स्वास्थ्यमा असर पुर्याउने खतरा बढ्ने गर्छ।
दशैंको लामो बिदामा घरमै बसेर आवश्यकता भन्दा बढी मासु र अस्वस्थकर खाना सेवन गर्दा धेरैजसो मानिसहरू दशैंपछि स्वास्थ्य समस्या लिएर अस्पताल धाउने गरेका छन्। विशेषज्ञहरूका अनुसार, आवश्यकताभन्दा बढी खानाले पेट तथा पाचन प्रणालीसँग सम्बन्धित समस्या देखिने जोखिम हुन्छ। त्यसैले दशैंको समयमा सन्तुलित खानपान र सावधानी अपनाउनु अत्यन्त आवश्यक छ।
जथाभावी खानाले निम्त्याउने समस्या
दशैंमा अत्यधिक मात्रामा खाइने मासु, चिल्लो परिकार र पेय पदार्थहरूले तत्कालीन र दीर्घकालीन स्वास्थ्य समस्याहरू निम्त्याउन सक्छ। विशेषगरी, दशैंमा खाइने राँगा, सुँगुर, कुखुरा, र खसीको मासुको अत्यधिक सेवनले पेटसम्बन्धी समस्या, अल्सर, पाचनप्रणालीमा गडबडी, फुड पोइजनिङ, र ग्यास्ट्रिक समस्या बढ्ने सम्भावना हुन्छ। दीर्घकालीन रूपमा हेर्दा, मोटोपन, कोलेस्ट्रोल, मधुमेह, हृदयाघात, उच्च रक्तचाप, मस्तिष्कघात जस्ता समस्याहरू पनि उत्पन्न हुन सक्छन्।
सन्तुलित खानपानको महत्व
चाडपर्वको रमाइलोमा अत्यधिक मासु र अन्य अस्वस्थकर खानेकुराको सेवन स्वास्थ्यका लागि हानिकारक साबित हुन सक्छ। यसले रमाइलोलाई रोगमा परिणत गरिदिन सक्छ। त्यसैले, दशैंको बेलामा मासु खाँदा सन्तुलन कायम गर्न विशेष ध्यान दिनुपर्छ। मासु खाएपछि शारीरिक क्रियाकलाप, जस्तै व्यायाम वा हिँडडुल गर्नु उपयुक्त हुन्छ। यसले पाचन प्रक्रियालाई मद्दत पुर्याउँछ। साथै, उसिनेको वा झोलयुक्त मासु सेवनले ग्यास्ट्रिकको समस्या कम गर्न सकिन्छ।
मासुका साथै प्रशस्त मात्रामा सागसब्जी, सलाद र पानीको सेवनले स्वास्थ्यलाई सन्तुलित राख्न सहयोग गर्छ। यदि मासु खाइसकेपछि असहज महसुस भएमा कागती पानी वा ज्वानो पानी सेवन गर्न सकिन्छ, जसले असहजता कम गर्न मद्दत गर्छ।
संतुलित खानपान र सक्रिय जीवनशैली अपनाएर दशैंको रमाइलो संगै स्वास्थ्यलाई पनि ध्यान दिन सकिन्छ।
यात्रा डेली
