वीरगञ्ज । सशस्त्र प्रहरी बलले वीरगञ्जमा दशैँको अवसरमा स्वास्थ्य शिविर सञ्चालन गरेको छ। सशस्त्र प्रहरी बल नेपाल नम्बर १३ गण हेडक्वाटर पर्साको आयोजनामा वीरगञ्जको घण्टाघर क्षेत्रमा लागेको मेलालाई लक्षित गर्दै शिविर सञ्चालन गरिएको हो। शिविरको उद्देश्य मेलामा आएका नागरिकलाई स्वास्थ्य सेवामा सहज पहुँच प्रदान गर्नु रहेको छ, विशेष गरी भीडभाडका कारण स्वास्थ्यमा समस्या उत्पन्न हुन सक्ने अवस्थालाई ध्यानमा राख्दै यो पहल गरिएको हो।

सशस्त्र प्रहरी उपरीक्षक राधेश्याम धिमालले मेलामा अत्यधिक भीडको कारणले कुनै किसिमको स्वास्थ्य समस्या उत्पन्न हुन सक्ने बताउँदै नागरिकको स्वास्थ्य सुरक्षाका लागि शिविर सञ्चालन गरिएको जानकारी दिए। उनले हालसम्म बर्त बसेका र गर्मीका कारण कमजोरी महसूस गर्ने सात जनाको उपचार गरिएको जानकारी दिएका छन्। ती बिरामीमा रिंगटा लाग्ने, अत्यधिक थकान, र कमजोरीको समस्या देखिएको थियो।

उपरीक्षक धिमालले मेलाका सहभागी नागरिकलाई स्वास्थ्यसम्बन्धी समस्या देखिएमा शिविरमा तत्काल सम्पर्क गर्न आग्रह गरेका छन्। स्वास्थ्य शिविरमा प्राथमिक उपचार र स्वास्थ्य जाँच सेवा उपलब्ध गराइएको छ, जसले नागरिकलाई सम्भावित स्वास्थ्य जोखिमहरूबाट बच्न मद्दत गर्नेछ।

धिमालका अनुसार शिविरमा आवश्यक औषधोपचारका साथै स्वास्थ्यसम्बन्धी परामर्श पनि दिइएको छ। स्वास्थ्यकर्मीहरूको टोलीले मेलामा अत्यधिक घमाइलो र भीडका कारण देखिन सक्ने स्वास्थ्य समस्याहरू, जस्तै डिहाइड्रेसन, थकान, र गर्मीजन्य अन्य समस्याहरूको समयमै उपचार गर्न सेवा दिइरहेको छ।

यो स्वास्थ्य शिविर आगामी केही दिनसम्म सञ्चालनमा रहने र मेलामा सहभागी हुने नागरिकलाई निरन्तर सेवा प्रदान गरिने बताइएको छ। सशस्त्र प्रहरी बलले यो शिविरलाई नागरिकसँगको सहकार्य र सुरक्षामा मात्र नभई स्वास्थ्य सेवामा पनि जिम्मेवारीपूर्वक सहभागिता जनाउने उद्देश्यले सञ्चालन गरेको छ।