काठमाडौं। माओवादी केन्द्रका अध्यक्ष पुष्पकमल दाहाल ‘प्रचण्ड’ले हाल देशमा चौतर्फी संकट आएको भन्दै यसलाई सामना गर्न सरकार, प्रतिपक्ष, मिडिया, र नागरिकहरू सबै मिलेर अघि बढ्नुपर्नेमा जोड दिएका छन्।
बुधवार बिहान सम्पादकहरूसँगको अन्तरक्रियामा प्रचण्डले अप्ठ्यारो परिस्थितिमा सरकारलाई मात्र दोष दिने कामले समाधान नहुने भन्दै एकजुट भएर राहत, उद्धार, र पुनर्निर्माणमा ध्यान दिनुपर्ने बताएका हुन्।
उनले भने, “अहिलेको परिस्थितिमा सरकारलाई दोष दिने होइन, सबै पक्ष मिलेर संकटको सामना गर्नुपर्ने बेला हो।” उनले वर्तमान संकटलाई भूराजनीतिक र भौगोलिक दुबै पक्षले उत्पन्न गरेको चुनौतीको रूपमा चित्रण गर्दै संकट जटिल रहेको बताए।
प्रचण्डले संविधान संशोधनका लागि आफू सकारात्मक रहेको र विगतमा मधेशी दल तथा जनतालाई चुनावमा सामेल गराउन संविधान संशोधनमा आफ्नो भूमिका महत्त्वपूर्ण रहेको पनि स्मरण गराए। साथै, उनले नेपालमा सत्ता समीकरणको परिवर्तनलाई आन्तरिक कारणले भएको भए पनि अन्तर्राष्ट्रिय दबाब र चलखेल दिन प्रतिदिन बढिरहेको औंल्याए।
अध्यक्ष प्रचण्डले नेपाल नयाँ शीतयुद्धको केन्द्रविन्दु बन्न सक्ने खतरा रहेको उल्लेख गर्दै भने, “अमेरिका र चीनबीचको प्रतिस्पर्धा र रुसको सुपरपावर हैसियत जोगाउन गर्ने अन्तिम प्रयासले नेपाल यस्तो केन्द्र बन्ने जोखिममा छ।”
प्रचण्डले विश्व भूराजनीति निकै चुनौतीपूर्ण रहेको र कतिपयले तेस्रो विश्वयुद्धको संघारमा रहेको दाबी गरेको भन्दै अन्तर्राष्ट्रिय चलखेल बढिरहेको तर्फ संकेत गरेका छन्।
संकटको यस घडीमा सबै पक्षको सामूहिक सहकार्य आवश्यक रहेकोमा उनले जोड दिएका छन्।