वीरगञ्ज । बडादसैँको नवरात्रको पाँचौँ दिन आज देशभरका दसैँ घर र पूजा कोठाहरूमा विधिपूर्वक स्कन्दमाताको पूजा गरिँदै छ । प्रत्येक वर्ष आश्विन शुक्ल पञ्चमी, अर्थात् दुर्गा पक्षको पाँचौँ दिन, स्कन्दमाताको विशेष पूजा गरिन्छ। नवदुर्गाका पाँचौँ रूप स्कन्दमातालाई शक्ति, ऐश्वर्य, र विद्या प्रदान गर्ने देवीका रूपमा पूजा गर्ने चलन छ ।

दसैँको पहिलो दिन शैलपुत्री, दोस्रो दिन ब्रह्मचारिणी, तेस्रो दिन चन्द्रघण्टा, चौथो दिन कुष्माण्डा, पाँचौँ दिन स्कन्दमाता, छैटौँ दिन कात्यायनी, सातौँ दिन कालरात्री, आठौँ दिन महागौरी, र नवौँ दिन सिद्धिदात्रीको पूजा गरिन्छ । नवदुर्गाका यी नौ रूपहरूको आराधना नौ दिनसम्म गरिन्छ ।

पौराणिक मान्यतामा, स्कन्दमाता देवीको कथा ऋषि सनतकुमारसँग जोडिएको छ । शिव र पार्वतीको ऋषि सभामा उपस्थित हुँदा सनतकुमार ध्यानमग्न भएकाले पार्वतीको श्रापले उँटको रूप लिएका थिए । यसपछि पार्वतीले उनीसँग पुत्र रूपमा जन्मने इच्छा व्यक्त गरेकाले स्कन्दमाताको नाम रहन गएको हो । स्कन्द भनेको सनतकुमारलाई जनाउँछ ।

नवरात्रमा देशभरका शक्ति पीठहरूमा भक्तजनको भिड लाग्ने गर्छ । वीरगञ्जसहित देशभर रहेका शक्ति पीठहरूमा पनि भक्तजनको लामो लाइन लाग्न थालेको छ । नवरात्रभर घटस्थापनाको दिनदेखि नवमीसम्म दुर्गा सप्तशती, श्रीमद्देवीभागवत, र देवी स्तोत्रहरूको पाठ गरिन्छ। विजयादशमीदेखि कोजाग्रत पूर्णिमासम्म दसैँको प्रसाद ग्रहण गरिन्छ ।

धार्मिक मान्यताअनुसार नवरात्रका दिनहरूमा देवीको पूजा आराधना गर्दा शक्ति र ऐश्वर्य प्राप्त हुन्छ, जसका कारण सनातन धर्मावलम्बीहरूले उत्साहपूर्वक नवरात्र पर्व मनाउँछन् ।