वीरगञ्ज । वीरगञ्ज महानगरपालिका–११, रानीघाटमा दुर्गा पूजा सेवा समितिको आयोजनामा आयोजित निःशुल्क स्वास्थ्य शिविर सफलतापूर्वक सम्पन्न भएको छ ।
समितिका अध्यक्ष शतिश सिंह राजपूतको नेतृत्वमा आयोजित उक्त शिविरमा पाँच सयभन्दा बढी बिरामीहरूले आफ्नो स्वास्थ्य जाँच गराएका छन् । स्थानीय समुदायलाई स्वास्थ्य सेवामा पहुँच पुर्याउने उद्देश्यले गरिएको यो शिविरले विभिन्न स्वास्थ्य समस्यामा पीडित बिरामीहरूलाई सेवा दिएको हो ।
शिविरमा डा. एपी जयसवाल, डा. स्वाती शाह, डा. स्मिता झा, डा. दिनेश झा, डा. कुन्दन सिंह राजपूत, र डा. मुकेश गुप्तालगायतका विभिन्न विशेषज्ञ चिकित्सकहरूले बिरामीहरूको स्वास्थ्य परीक्षण गरेका थिए । बिरामीहरूले सामान्य स्वास्थ्य जाँचदेखि लिएर विशेष परामर्श र औषधि उपचारको सुविधा प्राप्त गरेका थिए । चिकित्सकहरूको समर्पित सेवा र व्यवस्थापनको कारणले शिविर सफलतापूर्वक सम्पन्न भएको थियो ।
शिविरलाई सफल बनाउन वीरगञ्ज सकिन हेयर लेजर सेन्टरले विशेष सहयोग गरेको थियो । सेन्टरले आवश्यक उपकरण र अन्य स्रोत साधनको व्यवस्था गरेको थियो, जसले बिरामीहरूको स्वास्थ्य परीक्षणलाई सहज र प्रभावकारी बनाउन मद्दत पुग्यो ।
शिविरमा वीरगञ्ज महानगरपालिका वडा नम्बर ९ का वडाध्यक्ष जवाहर प्रसाद गुप्ता, समितिका सल्लाहकार गोपालप्रसाद रौनियार, समाजसेवी राजकुमार गुप्ता, छोटेलाल सर्राफलगायतका विभिन्न स्थानीय समाजसेवीहरूको उपस्थिति रहेको थियो । उनीहरूले समुदायमा यस्ता कार्यक्रमहरूले ठूलो सामाजिक महत्त्व राख्ने र स्वास्थ्य सेवामा सुधार ल्याउने विश्वास व्यक्त गरे।
समितिका अध्यक्ष राजपूतले समुदायका लागि निरन्तर सामाजिक र स्वास्थ्य सेवामा योगदान पुर्याउने उद्देश्यका साथ शिविरको आयोजना गरिएको जानकारी दिए । उनले भविष्यमा पनि यस्ता निःशुल्क स्वास्थ्य शिविरहरू, रक्तदान कार्यक्रमहरू, र अन्य सामाजिक सेवाका गतिविधिहरू निरन्तर सञ्चालन गरिने प्रतिबद्धता व्यक्त गरे ।
दुर्गा पूजा सेवा समितिले यसअघि पनि विभिन्न सामाजिक कार्यहरू गर्दै आएको र यस शिविरले समुदायमा स्वास्थ्य सम्बन्धी जनचेतना जगाउने र सेवा पुर्याउने महत्त्वपूर्ण भूमिका खेलेको बताइएको छ।
यस निःशुल्क स्वास्थ्य शिविरले आर्थिक रूपमा कमजोर वर्गका नागरिकहरूलाई प्रत्यक्ष लाभ पुर्याएको छ । ग्रामीण र सहरी क्षेत्रका बासिन्दाहरूले सहज रूपमा स्वास्थ्य परीक्षण र उपचार पाएकोले समुदायमा यस्ता कार्यक्रमहरूको माग पनि बढ्दै गएको छ । आयोजकले आगामी दिनमा पनि यस्ता सेवाहरूलाई निरन्तरता दिने योजना बनाएको जानकारी दिएको छ ।
यो शिविरले समुदायमा स्वास्थ्य सेवामा पहुँचको अभावलाई केही हदसम्म कम गर्ने र स्थानीय तहबाट यस्ता सेवा सञ्चालनको आवश्यकता झल्काएको छ ।
यात्रा डेली
