वीरगञ्ज। मौसम विभागले बंगालको खाडीमा फेरि चक्रवात आउने चेतावनी जारी गरेको छ, जसले गर्दा नेपालतर्फ पनि भारी वर्षाको अलर्ट जारी गरिएको छ । यसले गर्दा नेपाल र बिहारमाथि दोहोरो संकट मडारिएको छ । हाल नेपालमा आएको विपत्तिले बिहारमा बाढीको समस्या थप जटिल बनाएको छ, किनकि कोसी, गण्डक, घाघरा, र अध्वारा समूहका नदीहरू उफानमा छन् र यी सबै नदीहरू खतरा निशानभन्दा माथि बगिरहेका छन् ।

नेपालका गृहमन्त्री रमेश लेखकले राष्ट्रिय विपद् व्यवस्थापनलाई उच्च सतर्कतामा रहन निर्देशन दिएका छन् । हालैको भारी वर्षा र पहिरोका कारण नेपालमा ठूलो जनधनको क्षति भएको छ । यसपटक फेरि कोसी र बाग्मती प्रदेशसहित काठमाडौँ उपत्यकामा भारी वर्षाको चेतावनी दिइएको छ, जसले सम्भावित थप क्षतिको त्रास बढाएको छ ।

भारतको मौसम विभागले बंगालको खाडीमा न्यूनचापीय क्षेत्रको सम्भावना देखाएको छ, जसले टर्फ लाइनलाई वे अफ बंगालतर्फ सर्दै लगेको छभारतीय सञ्चार माध्यममा उल्लेख छ । यस कारण पूर्वोत्तर राज्यहरूमा पनि भारी वर्षाको सम्भावना प्रबल बनेको छ । पटनास्थित मौसम विभागका अनुसार बिहारका विभिन्न जिल्लाहरूमा तीव्र वर्षा र चट्याङको पूर्वानुमान गरिएको छ ।

बिहार हालसालै आएको बाढीबाट प्रभावित छ, र नेपालमा लगातार भइरहेको विपत्तिले स्थिति अझ जटिल बनाउन सक्छ । नदीहरूमा पानीको सतह बढिरहेकाले दुवै देशका प्रभावित क्षेत्रहरूमा विशेष सतर्कता अपनाउन आग्रह गरिएको छ ।

नेपाल र भारतका अधिकारीहरूले नागरिकलाई आवश्यक सावधानी अपनाउन र सुरक्षित स्थानमा बस्न आग्रह गरेका छन् ।