काठमाडौं। नेकपा माओवादी केन्द्रका अध्यक्ष पुष्पकमल दाहाल 'प्रचण्ड'सँग भएको भेटको सन्दर्भमा राप्रपाका नेता रवीन्द्र मिश्रले गरेका टिप्पणीप्रति अध्यक्ष प्रचण्डको सचिवालयले कडा खण्डन गरेको छ।

अध्यक्ष प्रचण्डका स्वीकीय सचिव रमेश मल्लले मिश्रको टिप्पणीमा कुनै सत्यता नभएको र यो पूर्णतः मनगढन्ते भएको बताएका छन्। मल्लका अनुसार, मिश्रले आफ्नो फेसबुक मार्फत भेटमा राखिएका विचारलाई प्रचण्डका विचारको रूपमा प्रस्तुत गर्दै गलत प्रचार गरेका छन्।

मल्लले सचिवालयको आधिकारिक धारणा व्यक्त गर्दै भनेका छन्, “हिजो विहान खुमलटारमा भएको भेटमा मिश्रले आफ्ना विचार व्यक्त गरे पनि त्यसलाई अध्यक्ष प्रचण्डको विचार भनेर प्रस्तुत गर्नु गलत हो। जसले संघीय लोकतान्त्रिक गणतन्त्र स्थापनाका लागि महान् बलिदानीपूर्ण आन्दोलनको नेतृत्व गरे, शान्ति प्रक्रिया र संविधान निर्माणमा योगदान दिए, उनीमाथि यस्ता आधारहीन टिप्पणी गर्नु राजनैतिक संस्कारविपरीत हो।”

सचिवालयले देशमा पञ्चायतको निरङ्कुशता र राजतन्त्रात्मक व्यवस्थाले निम्त्याएको जनताको बर्बादीलाई सम्झाउँदै, मल्लले थपे, “अझै पनि कुनै नेपाली भ्रममा हुन सक्छन् भन्ने प्रश्न उठ्छ। मिश्रले यस्ता अराजनैतिक र सस्तो प्रचारप्रति ध्यान नदिएको भए राम्रो हुने थियो।”

प्रचण्डको सचिवालयको यो प्रतिक्रिया मिश्रद्वारा गरिएको सामाजिक सञ्जाल पोस्टपछि आएको हो, जसमा मिश्रले अध्यक्ष प्रचण्डसँगको भेटको सन्दर्भमा आफ्ना धारणा सार्वजनिक गरेका थिए।