काठमाडौं। प्रधानमन्त्री केपी शर्मा ओलीले सरकारले प्राविधिक शिक्षा र व्यावसायिक तालिममा थप लगानी गर्दै उत्पादनशील र सीपयुक्त जनशक्ति निर्माणलाई आफ्नो प्राथमिकतामा राखेको बताएका छन्। ‘राष्ट्रिय शिक्षा दिवस, २०८१’ का अवसरमा शुभकामना सन्देश व्यक्त गर्दै प्रधानमन्त्री ओलीले विद्यालय तहदेखि उच्च शिक्षासम्मलाई प्रतिस्पर्धी, सीपमूलक, व्यावसायिक, रोजगारमूलक, तथा सूचना र प्रविधिमा आधारित बनाउनुपर्ने आवश्यकता औंल्याएका हुन्।
उनले शिक्षा क्षेत्रमा थप बजेट विनियोजन गर्दै दिगो विकासका लक्ष्यहरू हासिल गर्न र विद्यालय शिक्षा विधेयक, २०८१ लाई छलफलसहित पारित गर्न सरकारको प्रतिबद्धता रहेको बताए। प्रधानमन्त्री ओलीले विशेष गरी पिछडिएका वर्ग, क्षेत्र, लिङ्ग, र जातजातिलाई शिक्षाको मूलधारमा समाहित गरी गुणस्तरीय शिक्षाको समान अवसर उपलब्ध गराउनुपर्नेमा जोड दिए।
गुणस्तरीय शिक्षामा समन्वयको आवश्यकता
प्रधानमन्त्रीले तीन तहका सरकारबीच समन्वय र सहकार्यमा आधारित लगानी साझेदारी अभिवृद्धि गर्नुपर्ने आवश्यकता औंल्याएका छन्। "भएको लगानी र स्रोतसाधनको प्रभावकारी उपयोग गरी गुणस्तरीय शिक्षामार्फत रोजगार र नैतिक आचरणयुक्त नागरिक निर्माण गर्नु आवश्यक छ," ओलीले सन्देशमा भने।
उनले संविधानद्वारा प्रत्याभूत शिक्षासम्बन्धी मौलिक हकलाई कार्यान्वयन गर्न अनिवार्य तथा निःशुल्क शिक्षा ऐन, २०७५ जारी भएपछि असोज २ गतेलाई राष्ट्रिय शिक्षा दिवसका रूपमा मनाउन थालिएको उल्लेख गरे।
समृद्ध नेपाल र सुखी नेपालीको लक्ष्यमा शिक्षा
प्रधानमन्त्री ओलीले सन् २०३० सम्म दिगो विकासका लक्ष्यहरू हासिल गर्न विद्यालय तहदेखि उच्च शिक्षासम्मको शिक्षालाई समावेशी र गुणस्तरीय बनाउनुपर्नेमा जोड दिए। "समृद्ध नेपाल, सुखी नेपालीको आकांक्षा पूरा गर्न शिक्षालाई उत्कृष्ट ज्ञान केन्द्रका रूपमा विकास गर्नु आवश्यक छ," उनले भने।
प्रधानमन्त्रीले कक्षा १० को माध्यमिक शिक्षा परीक्षा (एसईई) मा ७० प्रतिशतभन्दा बढी विद्यार्थी उत्तीर्ण गराउने लक्ष्यमा सरकारले विशेष पहल गरिरहेको बताए। उनले देशव्यापी रूपमा सूचना प्रविधिको अतिरिक्त कक्षा सञ्चालन गर्न पनि योजना रहेको स्पष्ट पारे।
स्थानीय ज्ञान र सीपमा आधारित शिक्षा प्रणाली
प्रधानमन्त्रीले शिक्षालाई स्थानीय ज्ञान, सीप र प्रविधिसँग जोड्दै आधुनिकीकरण गर्नुपर्नेमा जोड दिएका छन्। साथै, उनले विद्यार्थीको टिकाउ दर सुधार गर्न र देशमै रोजगार र स्वरोजगारका अवसरहरू सिर्जना गर्न सरकार प्रयासरत रहेको बताए।
अन्त्यमा, प्रधानमन्त्री ओलीले बालबालिकाको सर्वाङ्गीण विकासका लागि शिक्षाका सबै अभियन्ताहरूलाई थप जिम्मेवार र जवाफदेही भएर योगदान गर्न आह्वान गर्दै सफलता कामना गरेका छन्।
यात्रा डेली
