वीरगञ्ज । वीरगञ्ज महानगरपालिकाले सार्वजनिक नालाको अतिक्रमण गरेर बनाइएको सामुदायिक क्याम्पसको संरचना एक वर्ष बितिसक्दा पनि हटाउन सकेको छैन ।
मेयरमा निर्वाचित भएपछि अतिक्रमण हटाउने अभियान थालेका महानगरपालिकाका अधिकारीहरूले सुरुमा तामझामसाथ केही संरचनाहरू भत्काए पनि, अभियानपछि कमजोर बनेको देखिन्छ ।
महानगरपालिकाले अभियान चलाउँदा आफ्ना नजिकका वडा अध्यक्ष तथा चुनावमा सहयोग गर्नेहरूको बाहेकका संरचनाहरू भत्काएको आरोप लागेको छ । तर, हरिखेतान बहुमुखी क्याम्पसले सार्वजनिक नालामा बनाएको संरचना भने महानगरपालिकाले हटाउन सकेको छैन ।
महानगरपालिकाका अधिकारीहरू दलबलसहित अतिक्रमण हटाउन पुगेका बेला क्याम्पस प्रशासनले आफैँ संरचना हटाउने आश्वासन दिएको थियो । तर, त्यसपछि पनि कुनै ठोस कदम नचालिएपछि महानगरपालिकाले डोजर लिएर पुनः नाला क्षेत्रतर्फ प्रस्थान गर्यो । एक वर्षको म्याद दिएर पनि क्याम्पसले संरचना नहटाएपछि स्थानीयहरूले पुनः विरोध गरेका थिए ।
हरिखेतान क्याम्पसले नालाको माथिल्लो भागमा पुनः पर्खाल लगाउन थालेको छ, जसले नगरवासीहरूको बिचमा थप असन्तोष फैलाएको छ । स्थानीयको विरोधका पश्चात् महानगरको टोलीले केही इट्टाहरू हटाए पनि नालामाथिको भव्य संरचना यथावत् नै रहेको छ ।
वीरगञ्ज महानगरपालिकाले यस मामिलामा अझै स्पष्ट कदम चाल्न सकेको छैन, जसले सार्वजनिक सम्पत्तिको अतिक्रमणबारे नगरवासीहरूको चिन्ता बढाएको छ ।
यात्रा डेली
