वीरगञ्ज । पर्सा प्रहरी प्रशासनको संरक्षणमा अभियान डिजिटल वर्ल्ड प्राईभेट लिमिटेडले ठगी धन्दा जारी राखेको पुष्टि भएको छ। वीरगञ्जको भिस्वा त्रिशुल चौक नजिकै रहेको यस कम्पनीको कार्यालयले वर्षौदेखि ठगी धन्दा सञ्चालन गर्दै आएको छ। कम्पनीले ईलेक्ट्रोनिक सामानहरूको एसेम्बली र विक्रीको अनुमति लिएर पनि, पर्सा जिल्लामा करिब ८ हजार सदस्य बनाएर हरेक महिनामा ११ सय ७५ रुपैयाँको दरले रकम संकलन गर्दै युट्युब मार्फत चिठ्ठा खेलाउँदै करोडौं रकम ठगी गरेको छ।
सोझासाझा जनतालाई सदस्य बनाई चिठ्ठा खेलाउने व्यक्तिहरू दिपेश वर्णवाल, सुशिल सर्राफ र ऋषिकान्त गुप्तालाई कारवाही नगर्दा प्रहरी प्रशासनको नै संरक्षण रहेको आरोप लगाइएको छ। अभियान डिजिटल वर्ल्ड प्राईभेट लिमिटेड नामक व्यवसायिक फर्मले दोलखा निवासी विष्णु प्रसाद काफ्लेको नाममा दर्ता भए पनि, दिपेश, सुशिल र ऋषिकान्तले वीरगञ्ज लगायतका स्थानहरूमा चिठ्ठा खेलाउँदै ठगी गरेका छन्।
कम्पनीले उद्योग स्थापना गर्ने ठेगाना काठमाडौं महानगरपालिका वडा नं. १३ मा भए पनि, उनीहरू देशका विभिन्न स्थानहरूमा चिठ्ठा खेलाउँदै ठगी गर्दै आएका छन्। वीरगञ्जमा मात्र चिठ्ठा खेल्नका लागि सदस्यहरूबाट प्रवेश शुल्क रु. ५० र मासिक शुल्क ११ सय ७५ रुपैयाँ संकलन गर्दै आएका छन्। यसरी संकलित रकमलाई चिठ्ठा खेल्ने बहानामा स्कूटी, मोटरसाइकल, कुलर, फ्रिज, वासिङ्ग मेसिन, मोबाईल, ल्यापटप र सुनका गरगहनाहरू देखाएर सदस्यहरूलाई लोभ्याउँदै आएका छन्।
चिठ्ठा ऐन २०२५ अनुसार, चिठ्ठा विक्री वितरण गर्न र खोल्न नपाउने व्यवस्था भए पनि, नेपाल सरकारको स्वीकृति लिएर मात्र चिठ्ठा खोल्न सकिने प्रावधान छ। गैरकानुनी रूपमा चिठ्ठा खेलाउनेलाई दफा ७ अनुसार बिगो जफत गरी जरिवाना वा ६ महिना सम्म कैद वा दुबै सजाय हुन सक्ने व्यवस्था रहेको छ।
यसरी प्रहरी प्रशासनको संरक्षणमा ठगी धन्दा जारी रहँदा, आम जनतामा अन्योल र डर छाएको छ। यस विषयमा प्रहरी प्रशासनले उचित कदम नचालेकोले जनतामा असन्तुष्टि छ।
यात्रा डेली
