वीरगञ्ज । वीरगञ्जको एक सहकारीले बचतकर्ताको रकम फिर्ता गरेको छ । वीरगञ्ज महानगरपालिका वडा नम्बर १० रानीघाटस्थित पब्लिक बचत तथा ऋण सहकारी संस्था लिमिटेडले बचतकर्ताको रकम फिर्ता गरेको हो ।
यसअघि ऋण दिने लोभमा बचतकर्तालाई दुःख दिएको खबर यात्रा डेलीले प्रकाश गरेको थियो । त्यस लगत्तै बचतकर्ताहरुले रकम फिर्ता दिलाउन आग्रह गर्दै जिल्ला प्रहरी कार्यालय पर्सामा निवेदन दिएका थिए ।
सोही निवेदनको आधारमा अस्थायी प्रहरी पोस्ट रानीघाटको टोलीले दबाब दिएपछि सहकारीले रकम फिर्ता गरेको बचतकर्ता वीरगञ्ज महानगरपालिका वडा नम्बर १२ मुर्ली निवासी दिपक महतोले बताए । मुश्किलले जम्मा गरेको ३५ हजार ६ सय रुपैयाँ फिर्ता पाउँदा उनी हर्षित मुद्रामा थिए ।
त्यसैगरी वीरगञ्ज महानगरपालिका वडा नम्बर १६ नगवा निवासी अजय कुमार मलीले पनि बचत गरेको ५३ हजार ४ सय रुपैयाँ फिर्ता पाएका छन् ।
वीरगञ्ज महानगरपालिका वडा नम्बर २४ रामगढवाका चन्दन प्रसाद पटेलले ५७ हजार रुपैयाँ फिर्ता पाए । उनलाई बचत गरेको रकम डुब्ने चिन्ता थियो । तर अहिले प्रशासन र प्रहरीको साथ पाएर रकम पाएकोमा बचतकर्ताहरु खुशी छन् ।