वीरगञ्ज । वीरगञ्जका विभिन्न स्थानमा छायांकन गरिएको र वीरगञ्जकै निर्देशक र मुख्य कलाकारले अभिनय गरेको वेब सिरिज ‘मिस स्कार्लेट’ को ट्रेलर सार्बजनिक भएको छ । कान्तिपुर फिल्म एकेडेमीले निर्माण गरेको ठूलो लगानीको सिरिज मिस स्कार्लेटको एकेडेमीले आफ्नै युट्युब च्यानलमार्फत सार्बजनिक गरेको हो ।

सिरिजका प्रमुख पात्रद्वय कुल श्रेष्ठ (कमल) र गीत बिष्ट हुन् भने आलिशा बास्तोला, कपिल रसाईली, सुमित्रा अधिकारी, सबी थापा, रोज खत्री, दिलिप नेपाल लगायतको पनि अभिनय गरेका छन् ।

सिरिज सस्पेन्स र थ्रिलरसँगै प्रेम र रोमान्सको मिश्रण रहेको सिरिजका लेखक तथा निर्देशक बलिराम चौहानले बताए ।  

कान्तिपुर फिल्म एकेडेमीले ओटीटी प्लेटफर्म ‘कान्तिपुर सिनेमाज’को शुभारम्भ गर्न आयोजना गरेको कार्यक्रमकै अवसरमा ट्रेलर सार्बजनिक गरिएको हो । पूर्व प्रधानमन्त्री तथा नेकपा एमालेका अध्यक्ष केपी शर्मा ओलीले उद्घाटन गरेको कार्यक्रममा वीरगञ्जका निर्देशक बलिराम चौहानसँगै वीरगञ्जकै मुख्य कलाकार कुल श्रेष्ठ कमल को कामले पनि काठमाण्डौमा प्रसंशा बटुल्यो । 

पूर्व प्रधानमन्त्री ओलीदेखि चलचित्र विकास बोर्डका अध्यक्ष भुवन केसी, निर्देशक तथा बरिष्ठ हाँस्य कलाकार दिपक राज गिरी लगायतका कलाकारले पनि बलिराम, कुल लगायतको कामको तारिफ गरेका थिए । 

मिस स्कार्लेट को छायांकन वीरगञ्जको घण्टाघर, ज्ञानदा एकेडेमी, क्लार्क रिसोर्ट लगायतका विभिन्न स्थानमा गरिएको छ । वीरगञ्जलाई सिरिजमार्फत देश तथा विदेशमा चिनाउने उद्देश्यले पनि यो काम गरिएको निर्देशक चौहानको भनाई छ । 

वेब सिरिजमा आफुले गरेको काम दर्शकले रुचाउनेमा सिरिजका प्रमुख पात्र कुल श्रेष्ठ कमल विश्वस्त छन् । आफुले आफ्नो चरित्र शतप्रतिशत निभाउने प्रयास गरेको बताउँदै उनले समग्र टिमको मेहनतको कदर हुने विश्वास व्यक्त गरेका छन् । 

कान्तिपुर फिल्म एकेडेमीका सीईओ प्रकाश पुरीले ‘कान्तिपुर सिनेमाज’मा मासिक २९९ रुपैयाँ तिरेर सबै सामाग्री हेर्न सकिने जानकारी दिए । पुरीले अनलाइन पेमेन्ट गरेर सब्स्क्रिप्सन गर्न सकिने बताउँदै ‘कान्तिपुर सिनेमाज’ नेपालको पहिलो सब्स्क्रिप्सन ढाँचाको ओटीटी प्लेटफर्म भएको दाबी गरे । ‘यो प्लेटफर्ममा नयाँ नेपाली फिल्म, सर्ट फिल्म र सिरिजहरू हेर्न पाउनुहुनेछ ।’ उनले अगाडि भने–‘संसारभर यस्ता खालका ओटीटी प्लेटफर्महरू छन् । जुन आज हलको विकल्पका रूपमा स्थापित भइसकेका छन् ।’

उनले, यस्तै प्रकारको प्लेटफर्मको विकास आफूहरुले गर्न चाहेको पनि बताए । कान्तिपुर सिनेमाज को मोवाइल एप्लिकेशन आइसकेको हुँदा डाउनलोड गरेर सब्स्क्रिप्सन गर्न सकिने उनको भनाई ।