×

अफगानिस्तानमा मंगलबार राति सवा १० बजेतिर गएको  ६.५ म्याग्निच्युडको भूकम्पमा परी अहिलेसम्म कम्तिमा ११ जनाको मृत्यु भएको छ । 

यस्तै एक सयभन्दा धेरै जना घाइते भएका छन् । अमेरिकी भौगर्भिक सर्वेक्षण (युएसजिएस) का अनुसार राति १० बजेर १७ मिनेट जाँदा आएको भुइँचालो ६.५ म्याग्निच्युडको थियो । भुइँचालोको कम्पन पाकिस्तानदेखि भारतको राजधानी दिल्ली र उत्तर भारतका विभिन्न ठाउँमा महसुस गरिएको थियो । 

भूकम्पको केन्द्रबिन्दु अफगानिस्तानको राजधानी काबुलबाट ३०० किलोमिटर दूरीमा रहेको जुर्म भन्ने ठाउँमा रहेको युएसजिएसले जानकारी दिएको छ । उक्त भूकम्पमा परी उत्तरपूर्वी प्रान्त लाघमानमा कम्तिमा पनि दुई जनाको मृत्यु भएको प्रकोप व्यवस्थापन मन्त्रालयका प्रवक्ता शफिउल्लाह रहिमीले अमेरिकी समाचार संस्था सिएनएनलाई बताएका छन्। उनका अनुसार कम्तिमा आठ जना घाइते भएको रिपोर्ट प्राप्त भएको छ ।

उक्त भूकम्पबाट पाकिस्तानमा प्रभाव बढी परेको छ। पाकिस्तानको उत्तरी क्षेत्रमा रहेको खैबर पख्तसनख्वा प्रान्तमा दुई बालबालिकासहित ९ जनाको मृत्यु भएको छ । 

खैबुर पख्तुनख्वा प्रान्तमै भूकम्पका कारण सय जनाभन्दा बढी घाइते भएका छन् । भूकम्पको कम्पनका कारण आएको पहिरोले उत्तरी पाकिस्तानी सहर एबोटाबादमा सडकसमेत अवरुद्ध भएका छन् ।

यो भूकम्पको तरंग जमिनको सतहभन्दा २१२ किलोमिटर मुनिबाट सुरू भएको थियो । अफगानिस्तानमा भने सतहभन्दा निकै तलबाट भुइँचालो तरंग उत्पन्न भएकाले त्यसको कम्पन निकै टाढा पाकिस्तानदेखि भारतसम्म महसुस गरिएको बताइएको छ ।

Back to top