वीरगञ्ज । बलिउड अभिनेता र शिवसेना नेता गोविन्दालाई मङ्गलवार मुम्बईको जुहूस्थित क्रिटी केयर अस्पतालमा आकस्मिक शल्यक्रिया गरिएको छ ।

उनीसँग रहेको लाइसेन्स प्राप्त बन्दुकबाट गोली चल्दा उनको खुट्टामा चोट लागेको थियो। हाल उनी खतरामुक्त छन् र स्वास्थ्यमा सुधार भइरहेको छ ।

शिवसेना नेता कृष्णा हेगडले मिडियामा सार्वजनिक गरेको अडियो वक्तव्यमा गोविन्दाले आफ्नो शुभेच्छुकहरूलाई धन्यवाद दिएका छन् । गोविन्दाले भने, “नमस्ते, प्रणाम । म गोविन्द । तपाईँहरूको आशीर्वाद, मेरा बाबुआमाको आशीर्वाद, र मेरा गुरुहरूको कृपाले म गोली लाग्दा पनि बाँच्न सकेँ । चिकित्सकहरूको विशेष ध्यान, विशेष गरेर डा. अग्रवालको म विशेष धन्यवाद दिन्छु । तपाईँहरूको प्रार्थना र समर्थनको लागि आभारी छु ।”

प्राप्त समाचार अनुसार, गोविन्दा मङ्गलवार बिहान कलकत्ताका लागि प्रस्थान गर्न तयारी गरिरहेका बेला उक्त घटना भएको थियो । गोविन्दाका नजिकका सहयोगी शशि सिन्हाले यस घटनाबारे जानकारी दिँदै भने, “उहाँ अहिले खतरामुक्त हुनुहुन्छ र ठिक हुँदै हुनुहुन्छ । उहाँ कलकत्ताका लागि यात्रा गर्न तयारी गरिरहनुभएको थियो, त्यही बेला यो घटना भयो । लाइसेन्स प्राप्त हतियारलाई आलमारीमा राख्दै गर्दा बन्दुक खसेर गोली चल्यो । खुट्टाको तलको भागमा गोली लागेको थियो, जुन अब निकालिएको छ । उहाँकी छोरी टीना अहिले अस्पतालमै हुनुहुन्छ । गोविन्दाजी सबैसँग कुरा गरिरहनुभएको छ र अवस्था सामान्य हुँदै छ ।”

गोविन्दाकी छोरी टीना आहुजा पनि अस्पतालमै रहेकी छिन् । उनले दिएको जानकारी अनुसार, गोविन्दाको शल्यक्रिया सफल भएको र गोली निकालिएको छ । उनलाई एक दिनका लागि आइसियुमा राखिएको छ, र त्यसपछि चिकित्सकहरूले उनको स्वास्थ्य अवस्थाको आधारमा निर्णय लिनेछन् । गोविन्दाकी श्रीमती सुनिता आहुजा पनि घटना भएका बेला यात्रा गरिरहेकी थिइन्, र उनी तुरुन्तै मुम्बई फर्केर अस्पतालमा पुगेकी छिन् ।

गोविन्दा अहिले स्थिर अवस्थामा छन् र स्वास्थ्यमा तीव्र सुधार भइरहेको जानकारी प्राप्त भएको छ । शल्यक्रियापछि उनी आफैँले मिडियासँग कुरा गरेर आफ्नो अवस्था बारे जानकारी दिएका छन्, र चाँडै नै अस्पतालबाट डिस्चार्ज हुने अपेक्षा गरिएको छ ।