वीरगञ्ज। संघीय सत्ता गठबन्धनको बैठकमा अशोक राई नेतृत्वको जनता समाजवादी पार्टी (जसपा) को भूमिका महत्त्वपूर्ण देखिएको छ। बैठकमा मधेश प्रदेशमा सत्ता गठबन्धनको नेतृत्व गरिरहेको जनमत पार्टी संघीय सरकारमा सहभागी नगराइए पनि गठबन्धनमा रहेका अन्य दलहरूको सक्रियता उच्च देखिएको छ।
सोमबार साँझ प्रधानमन्त्री निवास बालुवाटारमा बसेको बैठकमा सरकार सञ्चालन र न्यूनतम साझा कार्यक्रम निर्माणलगायत विषयमा छलफल भयो। बैठकमा नेकपा एमालेका अध्यक्ष एवं प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा, जसपा अध्यक्ष अशोक राई, लोसपा नेपालका अध्यक्ष महन्थ ठाकुर, नागरिक उन्मुक्ति पार्टीकी अध्यक्ष रञ्जिता श्रेष्ठ लगायतका नेताहरूको उपस्थिति थियो।
बैठकले संविधान संशोधनका लागि बृहत छलफल गर्ने समझदारी गरेको छ। कांग्रेस–एमालेबीच भएको सात बुँदे सहमतिअनुसार प्रमुख राजनीतिक दल र असन्तुष्ट पक्षसँग छलफल गरेर मात्रै संशोधन अघि बढाउने सहमति भएको छ। नाउपा अध्यक्ष श्रेष्ठले संविधानलाई अझै राम्रो बनाउने उद्देश्यले असन्तुष्ट पक्षको धारणा समेट्नेमा जोड दिएको बताइन्।
यद्यपि माओवादी केन्द्र लगायतका दलहरूले सरकारको आलोचना गरिरहेकाबेला प्रधानमन्त्री ओली र कांग्रेस सभापति देउवाले सरकारलाई थप बलियो बनाउने र यसको कामकारबाहीलाई प्रभावकारी बनाउने प्रतिबद्धता व्यक्त गरेका छन्। संविधान संशोधनका लागि माओवादी केन्द्र, जसपा नेपाल र नेकपा एसको समर्थन आवश्यक छ।
नाउपा गठबन्धनमा रहे पनि हालसम्म सरकारमा सहभागी भएको छैन भने जसपा र लोसपा सरकारमा सहभागी छन्। जनमत पार्टी मधेश प्रदेश सरकारको नेतृत्व गरिरहे पनि संघीय सरकारमा सहभागी नभएको र जसपाले प्रदेश स्तरमा संगठन बलियो बनाउँदै गएको छ।
बैठकमा सत्ता गठबन्धनले संविधान संशोधनलाई थप सशक्त बनाउन सबै पक्षसँग सहमति जुटाउने निष्कर्षमा पुगेको छ।
यात्रा डेली
