वीरगञ्ज । पर्सा सुनचाँदी व्यवसायी सङ्घ वीरगञ्जका अध्यक्ष भुलन सर्राफले जिल्ला प्रशासन कार्यालय पर्साबाट प्राप्त निर्देशनको अवहेलना गरेका छन्। जिल्ला प्रशासन कार्यालयले सङ्घको विधान विपरीत खारेज गरिएका दुई पदाधिकारीहरूको सदस्यता पुनर्स्थापनाको निर्देशन दिएको थियो। तर, अध्यक्ष सर्राफले उक्त निर्देशनको पालन नगरेको आरोप छ।
शुक्रवार, जिल्ला प्रशासन कार्यालयले सात बुँदे निर्देशन जारी गर्दै उपाध्यक्ष जयप्रकाश सर्राफ र सचिव लक्ष्मण प्रसाद साहको सदस्यता नवीकरण गर्न निर्देशन दिएको थियो। तर, आइतबार सङ्घको कार्यालयमा नवीकरणका लागि पुगेका उपाध्यक्ष सर्राफ र सचिव साहलाई अध्यक्ष भुलन सर्राफले कर्मचारीहरूलाई सदस्यता नवीकरण नगर्न आदेश दिँदै फिर्ता पठाए।
सङ्घको आगामी साउन ३२ गते हुने निर्वाचनका लागि अध्यक्ष पदका उम्मेदवार प्रवेश सर्राफका अनुसार, अध्यक्ष सर्राफ, महासचिव, र कोषाध्यक्ष कार्यालयबाट फरार भएको बताए। जिल्ला प्रशासन कार्यालयले विधान विपरीत खारेज गरिएका पदाधिकारीहरूको सदस्यता पुनर्स्थापना गर्न निर्देशन दिए पनि, अध्यक्ष सर्राफले उक्त निर्देशनको अवज्ञा गरेका हुन्।
प्रशासनले शुक्रवार नै लिखित रूपमा निर्देशन दिएको भए पनि अध्यक्ष सर्राफले यसलाई अवहेलना गर्दै सङ्घको कार्यालय छोडेका छन्। यस घटनाले आगामी निर्वाचनलाई थप विवादमा तान्ने सम्भावना रहेको देखिन्छ।
यात्रा डेली
