वीरगञ्ज । पर्सा जिल्लामा ट्राफिक व्यवस्थापनमा भइरहेको अव्यवस्थाका कारण सडक दुर्घटना र अकाल मृत्यु दरमा निकै वृद्धि भएको देखिएको छ। प्रहरी निरीक्षक भास्कर खतिवडा ट्राफिक प्रमुख बनेपछि दुर्घटना तथा मृत्यु दरमा उल्लेखनीय वृद्धि भएको पर्सा ट्राफिक प्रहरी कार्यालयको तथ्यांकले देखाएको छ।
आर्थिक वर्ष २०७९/८० मा ४९८ वटा सडक दुर्घटना भएकोमा २९ पुरुष, पाँच महिला र पाँच बालक गरी ३९ जनाले ज्यान गुमाएका थिए। त्यस्तै ९३ जना गम्भीर घाइते र ४०६ जना सामान्य घाइते भएका थिए। आर्थिक वर्ष २०८०/८१ मा भने ७९६ वटा दुर्घटना हुँदा ५१ जनाले ज्यान गुमाए भने ८४ जना गम्भीर घाइते र ७२० जना सामान्य घाइते भएका थिए।
ट्राफिक व्यवस्थापनको जिम्मेवारीमा रहेका प्रहरी निरीक्षक खतिवडाले ट्राफिक नियम पालना गराउन नसकेको, व्यक्तिगत लाभका लागि अवैध असुलीमा सक्रिय भएको र यसले दुर्घटनामा वृद्धि भएको देखिएको छ। राजश्व संकलनमा पनि कमी आएको छ। आर्थिक वर्ष २०७९/८० मा तीन करोड ४२ लाख ६५ हजार रुपैयाँ राजश्व संकलन भए पनि आर्थिक वर्ष २०८०/८१ मा दुई करोड ७६ लाख ६१ हजार नौ सय ५४ रुपैयाँ मात्र संकलन भएको छ।
क्षमताभन्दा बढी ओभर लोडका गाडीहरूका कारण सडकहरू छिट्टै जीर्ण हुन थालेका छन्। सुरुवातीमा ट्राफिक प्रहरीले ओभर लोडलाई नियन्त्रणमा लिएको भए पनि पछिल्लो समय कमिसन लिएर यसलाई नजरअन्दाज गरेको आरोप छ। यसले गर्दा सडक भत्कने र दुर्घटनाको जोखिम बढेको छ।
प्रदेश ट्राफिक प्रहरी कार्यालय पथलैयाले यसबारे चासो नदेखाएको र ट्राफिक व्यवस्थापनमा सुधारको आवश्यकता रहेको देखिन्छ। पर्सा ट्राफिकले अब अवैध असुली रोक्न र ट्राफिक व्यवस्थापनमा सुधार गर्नुपर्ने देखिन्छ।
यात्रा डेली
