राष्ट्रिय संगीतकर्मी संघ कास्कीेको छैटौं साधारण सभा तथा तेश्रो अधिवेशनबाट सुनिल गायक अध्यक्षमा सर्वसम्मत चयन भएका छन् । सुनिल गायकको अध्यक्षतामा गठीत नयाँ कार्यसमितिको प्रथम उपाध्यक्षमा कपिल श्रेष्ठ, द्वितिय उपाध्यक्षमा राजन सुवेदी, महिला उपाध्यक्षमा गंगा परियार, सचिवमा प्रकाश रसाईली, कोषाध्यक्षमा सोनिया कार्की खत्री, सह–सचिवमा नविन लामिछाने, सहकोषाध्यक्षमा सचिन भट्टराई, सदस्यहरुमा सुजित परियार, किसु गुरुङ्, रविन नेपाली, सूर्य बहादुर परियार, सुजन परियार, राज बराल, सिता सुवेदी, अनु विक, सागर रुम्बा रहेका छन् । 

निर्वाचित पदाधिकारी तथा सदस्यहरुलाई शनिबार नै शपथ ग्रहण गराई प्रमाणपत्र वितरण गरिएको छ । अधिवेशनको उद्घाटन राष्ट्रिय संगीतकर्मी संघ नेपालका अध्यक्ष प्रकाश कटुवालले गरेका थिए । उनले संघ संस्थाको हितमा रहेर गतिविधि बढाउन आग्रह गरेका छन् । साथै उनले संगीतकर्मीको संरक्षण तथा सम्मानसँगै नव पुस्तालाई प्रोत्साहन गर्नुपर्नेमा पनि जोड दिए । 

राष्ट्रिय संगीतकर्मी संघ गण्डकी प्रदेश अध्यक्ष रामचन्द्र ढकाल, संघका केन्द्रिय सदस्य ऋषिराम दहाल, संस्थाका सल्लाहकार तथा स्वतन्त्र पत्रकार संघ कास्कीका अध्यक्ष कृष्ण रानाभाट लगायतले नयाँ कार्यसमितिलाई अघि बढ्न शुभेच्छा प्रकट गरेका थिए । 

संघका कार्यबहाक अध्यक्ष कपिल श्रेष्ठको अध्यक्षतामा भएको कार्यक्रममा कोषाध्यक्ष हरिराज कोइरालाले स्वागत मन्तव्य राखेका थिए । कार्यक्रमको सहजीकरण निवर्तमान सचिव सुनिल गायकले गरेका थिए ।