×

वीरगञ्ज । पर्सामा अनुचित लेनदेन मिटरब्याज सम्बन्धी उजुरीको ५५ दशमलव ५० प्रतिशत उजुरी टुङ्गो लगाइएको छ। साहुकर र अनुचित लेनदेनपीडितबीच जिल्लाभरिमा नौ सय ५८ वटा उजुरी समाधान भएको छ। जिल्ला प्रहरी कार्यालय पर्साका अनुसार अझै एक हजार एक सय ९५ वटा उजुरी सम्बोधन हुन बाँकी छ।

जिल्ला प्रशासन कार्यालय पर्साले यसअघि पाँच सय सात वटा उजुरी टुङ्ग्याएको थियो भने जिल्ला प्रहरी कार्यालयले आफू मातहत आएका सात सय ३१ वटा उजुरीलाई टुङ्गोमा पुर्याएको छ। जिल्ला प्रहरी कार्यालय पर्साका प्रहरी नायब उपरीक्षक दीपक भारतीले साहुकर र पीडितबीच मेलमिलापका माध्यमबाट अधिंकाश मुद्दा समाधान गर्दै आइरहेको बताए।

“जिल्ला प्रशासन कार्यालयबाट अनुचित लेनदेनसँग सम्बन्धित उजुरी पर्सा प्रहरीमा आएसँगै सात सय ३१ वटा उजुरी टुङ्गो लगाएका छौँ,” उनले भने, “दिनहुँजसो दुवैपक्षसँग छलफल गरेर उजुरीलाई टुङ्गोमा पुर्याउने काम भइरहेको छ।”

गत माघ १७ गते जिल्ला प्रशासन कार्यालय पर्साबाट एक हजार ६ सय ५५ वटा अनुचित लेनदेनसँग सम्बन्धित उजुरी प्रहरीमा आएको थियो। त्यस्तै जिल्ला प्रहरी कार्यालयमा पनि थप चार सय ९८ वटा उजुरी परेको थियो। प्रहरीले गत माघ २४ गतेदेखि अनुचित लेनदेनसँग सम्बन्धित उजुरी लिन थालेको थियो।

नायब उपरीक्षक भारतीका अनुसार मिटरब्याजसँग सम्बन्धित विषय सामाजिक अपराध भएकाले पनि प्रहरीले दुवै पक्षलाई राखेर सकेसम्म मेलमिलापबाटै उजुरीलाई टुङ्गो लगाउँदै आएको छ। “वर्षौदेखि झेलिँदै आइरहेको समस्या भएकाले पनि साहुकर र अनुचित लेनदेन पीडितबीच पटकपटकको छलफलपछि मात्रै यस्ता किसिमका उजुरीलाई टुङ्गो लगाउन सकिएको छ,” उनले भने।

साहुकरले ऋणीबाट रु २४ करोड ७६ लाख ९६ हजार आठ सय ३० बराबरको रकम बिगो दाबी गरेका छन्। तीमध्ये पर्सा प्रहरीका अनुसार मेलमिलापबाट रु १३ करोड ४३ लाख ७६ हजार एक सय ३९ रकमको बिगो टुङ्गो लागेको छ। अनुचित लेनदेनसँग सम्बन्धित पाँच वटा मुद्दा भने जिल्ला अदालत पर्सामा दर्ता भएका छन्। प्रहरीले साहुकरबाट अनुचित लेनदेन पीडितलाई १५ बिघा १६ कट्ठा २४ धुर जग्गा फिर्ता गराएको छ।

५५.५०% उजुरी टुङ्गो: पर्सामा मिटरब्याज सम्बन्धी ९५८ उजुरी टुङ्गो, ११९५ उजुरी बाँकी।

मेलमिलापद्वारा समाधान: प्रहरी नायब उपरीक्षक दीपक भारतीको भनाइ अनुसार मेलमिलापद्वारा अधिंकाश उजुरी टुङ्गो।

साहुकरको दाबी: साहुकरले रु २४ करोड ७६ लाख ९६ हजार आठ सय ३० रकमको बिगो दाबी गरेका, मेलमिलापबाट रु १३ करोड ४३ लाख ७६ हजार एक सय ३९ रकमको बिगो टुङ्गो।

जग्गा फिर्ता: प्रहरीद्वारा १५ बिघा १६ कट्ठा २४ धुर जग्गा फिर्ता।

जिल्ला अदालतमा मुद्दा: अनुचित लेनदेनसँग सम्बन्धित पाँच मुद्दा अदालतमा दर्ता।


 

Back to top