वीरगञ्ज, १ माघ । पछिल्लो समय मानिसहरु मौलिकतामा रमाउने क्रम बढ्दै गएको छ । मौलिकतासँगै अलिकति नयाँपन र केही फरकपनले आकर्षित गराउनु स्वभाविक पनि हो । तपाई वीरगञ्जमा बस्नुहुन्छ भने खाजा तथा खाना खानेदेखि लिएर जन्मदिन, वैवाहिक वर्षगाँठ लगायतका क्रियाकलापमा सरिक हुन होटल तथा रेस्टुराँहरुमा त पक्कै पनि पुग्नुभएकै होला । यदि पुग्नुभएको छैन भनेपनि यहाँका नाम चलेका होटल तथा रेस्टुराँहरुको नाम त पक्कै पनि सुन्नुभएकै छ ।
वीरगञ्जको मुटु भनिने आदर्शनगरस्थित ग्रिनसिटी चोकमै अवस्थित होटल कैलाशको नाम नसुन्ने वीरञ्जबासी सायदै होलान् । त्याहाँ जानेहरुले पक्कै पनि करिब २ वर्ष अघिको होटल कैलाश र अहिलेको होटल कैलाशबिच आकाश पातालको भिन्नता पाउनुहुन्छ । फर्नीचर, फ्लोरिंग, लाईट, सिलिङ्, वाल, कलर लगायतको कम्बिनेशनले बस्दा पनि बसीरहुँ लाग्छ ।
ठूला ठूला कार्यक्रम, सभा सम्मेलनदेखि विवाह वर्तबन्धमा समेत अत्यन्तै व्यस्त हुने होटल भिस्वाको स्वरुप पनि अहिले फेरिएको छ ।
त्यस्तै वीरगञ्जको आदर्शनगरस्थित होटल पूजन, मकालु होटल, अनमोल स्विट्स, आदर्शनगरमै रहेको बाल मन्दिर, फिटलाईन फ्याक्ट्री लगायतका दर्जनौ स्थानहरुमा पनि ग्राहकहरुलाई मोहित बनाउन आकर्षक सजावट गरिएको छ ।
यी स्थानमा आउने ग्राहकहरुले झट्ट अड्कलबाजी गर्छन्, ‘पक्कै पनि यति राम्रो सजावट गर्ने कोही बाहिरकै मान्छे हुनुपर्छ, अनि खर्च पनि धेरै लाग्यो होला ।’ खासमा यस्तो अनुमान लगाउनु स्वभाविक पनि हो । म पनि यस्तै सोचीरहेको थिए । तर म भ्रममा रहेछु भन्ने थाहा त्यतिबेला भयो, जब यि सबै सजावट तथा इन्टेरियर डिजाईन वीरगञ्जकै युवाले गरेका हुन् भन्ने जानकारी प्राप्त भयो ।
उनी हुन् वीरगञ्जको माईस्थान निवासी सुशोभित रन्जितकार । संयोग भन्नुपर्छ उनको नाम र काम दुवै मिल्छ । नाम सुशोभित भएजस्तै उनको काम पनि सुशोभित बनाउने हो । सुमन कुमार रन्जितकार र मुना रन्जितकारका छोरा सुशोभित ले वीरगञ्जकै ज्ञानज्योती स्कुलबाटै प्लस टु उतिर्ण गरे । सानैदेखि डिजाईनिंगतिर रुची भएपनि इन्टेरियर आर्किटेक विषय हुन्छ र यसको अध्यापन हुन्छ भन्ने कुराको जानकारी उनीसँग थिएन ।
प्लस टु सकिएपछि काठमाण्डौ पुगेका सुशोभित लाई उनकै दिदीले ईन्टेरियर आर्किटेक पढ्न सुझाव दिइन् । रुचीकै क्षेत्रको पढाई हुने थाहा पाएपछि सुशोभितसँग खुशीको सीमा थिएन । आई ई सी कलेज अफ आर्ट एण्ड फेशनमा भर्ना भएका उनले २०७० सालमा इन्टेरियर आर्किटेकबाट स्नातक सके ।
अध्ययन सकिए लगत्तै उनले काम गर्न थालनी गरे । ‘रेड पेपर डिजाइनर्स’ नामक आफ्नै कम्पनी शुरुवात गरेर उनले इन्टेरियर आर्किटेक ईन्जिनियरसँगै युवा उद्यमीको पनि परिचय बनाए । काठमाण्डौको कलङ्की १४ लामपाटीमा प्रधान कार्यालय रहेको यसको शाखा केही दिनमै वीरगञ्ज र हेटौडामा बिस्तार गर्ने सुशोभितको योजना छ । भारतमा प्रख्यात क्याफे कफी डे को शाखा काठमाण्डौमा स्थापना भएपछि त्यसकै इन्टेरियर डिजाईन गर्ने कामबाट उनले आफ्नो इन्टेरियर आर्किटेकको यात्रा आरम्भ गरे । त्यसपछि उनले अहिलेसम्म पछाडी फर्किनुपरेको छैन ।
महिन्द्राको अग्नि ग्रुप, काठमाडौंको दरबार मार्गस्थित किंगस लंज, प्यासिफिक इन्टरप्राइजेजको कार्यालय, ओम सिमेन्टको कार्यालय लगायत देशैभर १ सय भन्दा धेरै परियोजनामा काम गरीसकेको अनुभव उनले छोटो समयमै बटुल्न सफल भएका छन् ।
शुरुवाती चरणमा संघीय राजधानी काठमाण्डौमै बढी व्यस्त हुने उनी पछिल्लो केही समय यता आफ्नै जन्मथलो वीरगञ्जमा बढी समय बिताइरहेका छन् । आफ्नै ठाउँमा काम गर्ने सोचका साथ उनले यहाँकै होटल, रेस्टुराँ, कार्यालयदेखि आवासीय घरहरुमा पनि इन्टेरियर डिजाइनिंगका कामहरु गरीरहेका छन् ।
वीरगञ्जका इन्टेरियर आर्किटेक्ट ईन्जिनियरको माग संघिय राजधानी काठमाण्डौदेखि बागमती प्रदेशको राजधानी हेटौडा, बुटवल, चितवन, धरान, बिराटनगर लगायत मेची देखि महाकालीसम्मका शहरहरुमा हुनु पक्कै पनि वीरगञ्जका लागि सुखद पक्ष हो ।
र्सिजनात्मक वास्तुकलातर्फ उनलाई विभिन्न संघ संस्थाले सम्मानीतका साथै पुरस्कृत समेत गरेका छन् । इन्टेरियर आर्किटेक्टको माग अत्यधिक हुनुका साथै यसको स्कोप पनि राम्रो भएको हुँदा उनले वीरगञ्जमै यसको पठनपाठन गराउने प्रयास गरीरहेका छन् ।