वीरगञ्ज ११ असोज । आईपीएल टी-ट्वान्टी क्रिकेटमा रोयल च्यालेन्जर्स बैंगलोरले मुम्बइ इन्डियन्सलाई पराजित गरेको छ ।
दुबइमा आइतबार राति भएको खेलमा बैंगलोरले साविक विजेता मुम्बइलाई ५४ रनले पराजित गरेको हो ।
बैंगलोरले दिएको १ सय ६६ रनको लक्ष्य पच्छ्याएको मुम्बइ १८ ओभर १ बलमा अलआउट हुँदै १ सय ११ रनमा समेटियो ।
मुम्बइका लागि कप्तान रोहित शर्माले सर्वाधिक ४३ रन र क्विन्टन डी ककले २४ रन बनाउन बाहेक अन्य ब्याट्स्म्यानले उल्लेख्य योगदान गर्न सकेनन् ।
बैंगलोरका हर्सल पटेलले ह्याट्रिकसहित ४ विकेट लिए । उनले १६ ओभरको पहिलो, दोस्रो र तेस्रो बलमा विकेट लिएर ह्याट्रिक पूरा गरेका थिए । युजभेन्द्र चाहलले ३ तथा ग्लेन म्याक्सवेलले २ विकेट लिए ।
पहिले ब्याटिङ गरेको बैंगलोरले २० ओभरमा ६ विकेट गुमाएर १ सय ६५ रन जोडेको थियो ।
बैंगलोरका ग्लेन म्याक्सवेलले ५६ रनको अर्धशतकीय इनिङ्स खेल्दा कप्तान विराट कोहलीले ५१ रनको अर्धशतकीय इनिङ्स खेले । श्रीकर भारतले ३२ रन जोड्दा एबी डी भिलियर्सले ११ रन बनाए ।
जितसँगै बैंगलोर १० खेलमा १२ अंकसहित तेस्रो स्थानमा छ । मुम्बई ८ अंकसहित सातौं स्थानमा छ ।
यात्रा डेली
