×

वीरगञ्ज ६ असोज । प्रतिभावान कलाकार तथा निर्देशक ज्योति काफ्लेको लेखन तथा निर्देशनमा नयाँ हास्य टेलिश्रृंखला ‘गंजागोल भन्ने हाम्लाई लाइराछ’ यसै साताबाट प्रसारण हुने भएको छ ।

नेपाल टेलिभिजनबाट हरेक साता प्रसारण हुने यो श्रृंखलाको पहिलो भाग यही सोमबार बेलुकी ७ः२५ बजे प्रसारण हुनेछ । चर्चित हास्य टेलिश्रृंखला ‘भद्रगोल’ का दुईमध्ये एक निर्देशक काफ्लेले उक्त श्रृंखलाबाट हात झिकेपछि आफ्नै प्रोडक्सन फोके नेपाल मिडिया प्रालिबाट नयाँ श्रृंखला ल्याएका हुन् ।

नेपाल टेलिभिजनमा प्रसारण भएलगत्तै उक्त श्रृंखलालाई डिजिटल माध्यममा ओएसआर डिजिटलले युट्युबमा सार्वजनिक गर्नेछ ।

निर्देशनसँगै काफ्ले श्रृंखलामा मुख्य कलाकारका रुपमा पनि देखिने छन् । यसअघि बाबुराम भट्टराई र केपी ओलीको स्वरुपमा कला देखाएर चर्चित भएका उनी त्यससँगै मङ्गल थारु र गल्कोटे बाका रुपमा पनि देखिने छन् ।

त्यस्तै श्रृंखलामा शिवहरि नेपाल, रोशनी सापकोटा, विद्या कार्की, सुमन ज्योति नेउपाने –ल्याङ्ग्री दादा), प्रकाश स्वर्णकार (बबुवा थारु), बन्दना कार्की, सुसन राई (भाले, पुजन घिमिरे, सिर्जना जिसी, पूजा पन्त, रियाज काफ्ले, बिपना बस्नेत, (नक्कली हिसिला), राजन भुजेल (हल्दार), सुशान्त पाठकलगायत कलाकार देखिने छन् । कलाकारसँगै शिवहरि नेपाल श्रृंखला निर्देशनको जिम्मेवारीमा पनि हुनेछन् ।

चितवनको सिनर्जी एफएमबाट करियर सुरु गरेका काफ्लेले नेपाली चलचित्रमा मुख्य अभिनेताका रुपमा समेत काम गरिसकेका छन् । त्यस्तै नेपाल टेलिभिजनबाट प्रसारण हुने विभिन्न टेलिश्रृंखलामा उनी कलाकारका रुपमा स्थापित छन् ।

समाजमा भएका बेथितिलाई श्रृंखलामा व्यंग्य गरिने बताए । “समाजमा धेरैथरिका मान्छे हुन्छन्”, उनले भने, “केही काम गर्न आँट गर्नेहरुलाई समाजमा भएका केही मान्छेहरुले अराजकता निम्त्याएर बिथोल्छन्, त्यही कथा नै गञ्जागोलमा प्रस्तुत गरिने छ ।”

टेलिश्रृंखलाका निर्माता प्रकाशकुमार सुवर्णकार हुन् भने दिलीप विष्ट र रामकृष्ण कँडेलले दृश्य खिच्नेछन् । त्यसैगरी टेलिश्रृंखलाको इडीटिङ् रिशव ओझाले गरेका छन् ।

Back to top