प्रदेश २ का कृषकहरूको चार महीनाको ब्याज मिनहा

236

वीरगञ्ज २३ असार । प्रदेश २ सरकारका भूमि व्यवस्था, कृषि तथा सहकारीमन्त्री शैलेन्द्रप्रसाद साहले प्रदेश सरकार जनताको हकमा काम गरिरहेको भाषणमा मात्र होइन, व्यवहारमा पनि लागू रहेको बताएका छन् ।

लकडाउनको क्रममा कृषि क्षेत्रमा प्रतिकूल प्रभाव न्यूनीकरण गर्ने उद्देश्यले ब्याज अनुदान चेक हस्तान्तरण कार्यक्रममा मन्त्री साहले चार महीनाको ब्याज मिनहा गर्दा ८० हजार जनता प्रत्यक्षरूपमा लाभान्वित भएको बताए । ८० लाख जनसङ्ख्या भएको प्रदेशमा ४० लाख कृषक रहेकाले सरकारले कृषिलाई वैज्ञानिकीरण, आधुनिकीरण गर्न योजनाअनुरूप अगाडि बढिरहेको बताए । लकडाउन अवधिमा प्रत्यक्षरूपमा प्रभावित भएको कृषि क्षेत्र उकास्न र कृषिमा लगानी गर्ने वातावरण बनाउँन प्रदेश सरकारले लागिपरेको बताए।

मन्त्री साहले विदेशबाट दश लाख युवा प्रदेश २ मा आउने क्रम जारी रहेकोले चुनौती थपिंदै गएको बताए । कृषि क्षेत्रमा नै बेरोजगारी युवाहरूलाई रोजगार दिन प्रदेश सरकारले आगामी आवमा प्रत्येक किसानलाई राहत पुग्ने योजना ल्याएको बताए । रु ५ लाखसम्म कृषि ऋण लिएका किसानहरूको ब्याज माफ गरेर हुँदैन, आगामी आवसम्म पचास लाख रुपैयाँसम्म ऋण लिएका किसानको पनि ब्याज मिनहा गर्ने योजना अनुसार सरकार अगाडि बढिरहेको उनले बताए ।



मन्त्री साहले कुखुरा व्यवसायमा ढुवानी र चल्लाको उत्पादन लागि योजना ल्याएको बताए । प्रदेशका आठवटै जिल्लामा पहिलोपटक पर्सा जिल्लाले ऋण मिनहाको योजना चाँडै सकाएकोले धन्यवाद दिएका थिए । मुख्यमन्त्री कृषि योजना अन्तर्गत प्रदेशभरिमा दश कट्ठासम्म खेत भएका व्यक्तिहरूको खातामा सीधैं दश हजार प्रदेश सरकारले पठाउने तयारी गरिरहेको उनले बताए ।

कार्यक्रममा सहभागीहरूले ब्याज मिनहाभन्दा ब्याजदर सस्तो गरे किसानहरूलाई समस्या नपर्ने बताएका थिए । उनीहरूले कृषिको लागि भनी ऋण लिएर अन्य क्षेत्रमा लगानी गर्नेहरूमाथि कारबाई गर्नुपर्ने माग गरे ।

पर्साको हकमा प्रदेश सरकारले ३ करोड १० लाख रुपैयाँ ब्याज अनुदानमा बजेट विनियोजन गरेकोमा २ करोड ९६ लाख ४५ हजार रुपैयाँ खर्च भइसकेको छ । पर्सामा जम्मा ५ हजार ३ सय ६१ जना निवेदकहरूबाट रु ५ लाखसम्म ऋण लिएका ४ हजार६ सय ६५ जना ऋणीको ब्याज मिनहा भएको कृषि ज्ञान केन्द्र पर्साका प्रमुख डा रामचन्द्र यादवले बताए ।

यादवका अनुसार ५ लाखदेखि १५ लाख रुपैयाँ ऋणसम्म रु ७८ लाख ब्याज र १५ लाखदेखि ३० लाख रुपैयाँ ऋण लिएका ऋणीहरूको ब्याज मिनहा गर्न रु ८० लाख ५० हजार रकम चाहिने भएकोले प्रदेश सरकारले उनीहरूको पनि ब्याज मिनहा गर्ने तयारी गरिरहेको छ । २३ वटा बैंक, २५ वटा लघुवित्त संस्था, २२ वटा सहकारीमार्फत् ब्याज मिनहा भएको छ ।

जिल्ला समन्वय समिति पर्साका प्रमुख नेक महम्मद अन्सारीको सभापतित्वमा भएको कार्यक्रममा मन्त्रालयका सचिव विमलकुमार निरौला, समाजवादी पार्टीका जिल्ला अध्यक्ष रामनरेश यादव, केन्द्रीय सदस्य वीरेन्द्र यादव, सहकारी सङ्घका हृदयनारायण कुर्मी, सुजीतप्रसाद साहलगायतले मन्तव्य व्यक्त गरेका थिए भने कार्यक्रम सञ्चालन मुनीलाल श्रीवास्तवले गरेका थिए ।


LEAVE A REPLY

Please enter your comment!
Please enter your name here