वैदले गराए अर्थ राज्यमन्त्रीको ध्यानाकर्षण

446

वीरगञ्ज, ३० पुस वीरगञ्ज उद्योग वाणिज्य सङ्घका पूर्वअध्यक्ष एवम् नेपाल–भारत सहयोग मञ्चका केन्द्रीय अध्यक्ष अशोकुमार वैदले बारा पर्साका सिमेण्ट उद्योगको समस्या समाधानमा सरकार गम्भीर नभएको आरोप लगाएका छन् । वीरगञ्ज उद्योग वाणिज्य संघको ४२ औ वार्षिक साधारणसभामा बोल्दै वैदले भारतीय रेलवेले रक्सौल यार्डमा क्लिङ्कर अनलोडमा प्रतिबन्ध लगाएपछि बारा र पर्सा जिल्लामा सञ्चालित १३ ओटा सिमेण्ट उद्योगहरु कच्चा पदार्थको अभावमा बन्द हुने अवस्थामा पुगेको भए पनि नेपाल सरकार समाधानमा उदासिन देखिएको बताएका हुन् ।
कार्यक्रममा सहभागी अर्थराज्यमन्त्री उदय समशेर राणाको ध्यानाकर्षण गराउँदै वैदले तत्काल विकल्पको खोजी गरी तत्काल उद्योगको समस्या निराकरण गर्न माग गरे । नेपालका उद्योगको समस्या भएकाले समाधानमा नेपाल सरकार नै बढी जवाफदेही बन्नुपर्ने उनको धारणा थियो ।
समाधानको पहल गर्न आफू भारतीय पक्षसम्म पुगेको भन्दै उनले नेपालले सम्झौता गरेमा भारतीय पक्ष पूर्वाधार बनाइदिन तयार रहेको पनि वैदको भनाइ छ । भारतीय पक्षले २ वर्षअघि नै त्यसका लागि नेपाल सरकारलाई पत्राचार गरेकोमा सरकारकै उदासिनताका कारण अहिलेसम्म सम्भव हुन नसकेको बताए ।